Энергетика министрлігі Қазақстанда автогаз тапшылығы жоқ екенін мәлімдеді
Ведомство батыс өңірлердегі автогаз құю бекеттеріндегі кезектерді уақытша логистикалық қиындықтармен түсіндірді
Қазақстанда сұйытылған мұнай газының тапшылығы жоқ, ал өткен аптада батыс өңірлердегі жекелеген автогаз құю станцияларында пайда болған кезектер отынды жеткізуге байланысты болды. Бұл туралы үкіметтегі брифингте энергетика вице-министрі Қайырхан Тұтқышбаев мәлімдеді, деп хабарлайды Kapital.kz іскерлік ақпарат орталығының тілшісі.
Оның айтуынша, еліміздегі барлық газ өңдеу зауыттары штаттық режимде жұмыс істеп тұр, ал сұйытылған газдың қажетті көлемі өңірлер арасында алдын ала бөлінген.
«Министрлік айдың басынан бастап өңірлерге қажетті барлық көлемді бөлді. Қосымша газ өндіру мүмкіндігі болған жағдайда, оны да өңірлерге үлестіреміз. Қазіргі таңда өңірлерде қандай да бір тапшылық жоқ», – деді Қайырхан Тұтқышбаев.
Вице-министр сондай-ақ өткен аптада еліміздің батысындағы бірқатар өңіріндегі автогаз құю станцияларында пайда болған кезектер туралы ақпаратқа пікір білдірді.
«Министрлік қажетті көлемнің барлығын уақытылы бөлді. Ол жақтағы мәселе сұйытылған мұнай газын тасымалдау мен жеткізуге байланысты болды. Белгілі бір қорлану орын алды. Қазір бұл мәселелердің барлығы шешілді. Өңірлерде ешқандай тапшылық жоқ», – деді вице-министр.
Оның айтуынша, энергетика министрлігі әкімдіктермен және «Қазақстан темір жолы» ҰК» АҚ-мен бірлесіп, жағдайды тұрақты бақылауда ұстап, туындаған мәселелерді жедел шешіп келеді.
«Мұндай жайттар кейде болады, бірақ біз оларды барынша алдын ала шешуге тырысамыз», – деп қосты ол.
Бүгін вице-министр Ресейдегі Омбы мұнай өңдеу зауытының ұшқышсыз ұшу аппараттарының шабуылынан кейін тоқтауы Қазақстанды жанармаймен қамтамасыз етуге қауіп төндірмейтінін де мәлімдеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
