• Басты бет
• Экономика
• Энергетика министрлігі Омбы МӨЗ тоқтауы Қазақстанның жанар-жағармай нарығына қалай ықпал ететінін бағалады

Энергетика министрлігі Омбы МӨЗ тоқтауы Қазақстанның жанар-жағармай нарығына қалай ықпал ететінін бағалады

Қазақстандық мұнай өңдеу зауыттары қалыпты режимде жұмыс істеп тұр

Ресейдегі Омбы мұнай өңдеу зауытының ұшқышсыз ұшу аппараттарының шабуылынан кейін тоқтауы Қазақстанды жанар-жағармаймен қамтамасыз етуге ешқандай қауіп төндірмейді. Бұл туралы Үкіметте өткен брифингте Энергетика вице-министрі Қайырхан Тұтқышбаев мәлімдеді, деп хабарлайды Kapital.kz іскерлік ақпарат орталығының тілшісі.

Журналистер Ресейдегі ең ірі мұнай өңдеу зауыттарының бірінің тоқтауы Қазақстанға жанар-жағармай жеткізуге әсер етуі мүмкін бе деп сұраған еді.

«Омбы мұнай өңдеу зауытындағы жағдай отандық мұнай өңдеу зауыттарының жұмысына ешқандай ықпал етпейді. Шекара маңындағы аймақтарға және ол жерде жанар-жағармай тұтынудың күрт өскені туралы ақпаратқа келсек – бүгінде еліміздің аумағына тәулігіне бір реттен артық кіруге тыйым салатын бұйрық күшінде тұр. Бұл оңтүстіктегі, шығыстағы және солтүстіктегі барлық шекаралық аймақтарға қатысты. Бізде жанар-жағармайдың қажетті қоры бар, халық арасында ешқандай тапшылық сезіліп отырған жоқ», – деді вице-министр.

Ол сондай-ақ Қазақстанның қазіргі уақытта Ресейден бензин сатып алмайтынын және ішкі сұранысты өз өндірісі есебінен толық өтеп отырғанын атап өтті. Көрші елден тек дизель отыны мен авиациялық керосин ғана импортталады.

«Бүгінгі таңда бізде дизель отыны мен авиациялық отын бойынша теңгерім сақталған. Сондай-ақ мұнай өнімдерін жеткізудің баламалы бағыттарын дамыту жұмыстарын жалғастырып жатырмыз», – деп толықтырды вице-министр.

Айта кетейік, 6 маусымда ұшқышсыз ұшу аппараттары Омбы мұнай өңдеу зауытына шабуыл жасаған болатын.

Бұған дейін Reuters агенттігі сенімді дереккөздерге сүйеніп, Ресейдің Қазақстаннан АИ-92 маркалы 50 мың тоннаға жуық бензин импорттау мүмкіндігін талқылап жатқанын хабарлаған еді. Агенттіктің мәліметінше, мұндай жеткізілімдердің қажеттілігі кейбір мұнай өңдеу зауыттарының тоқтауы мен жоспардан тыс жөндеу жұмыстарының жүргізілуінен туындаған ресейлік нарықтағы жанар-жағармайдың уақытша тапшылығымен байланысты.

Энергетика министрінің орынбасары Ерлан Ақкенженов Қазақстанның Ресейге бензин жеткізу бойынша келіссөздер жүргізіп жатқаны туралы ақпаратты жоққа шығарды. Оның айтуынша, бүгінгі таңда ведомствоға ресейлік тараптан ресми сауал түскен жоқ.

Сондай-ақ Қазақстанның Еуразиялық экономикалық одаққа кірмейтін елдерден келетін жанар-жағармай материалдарына импорттық баж салығын уақытша алып тастау мүмкіндігін қарастырып жатқаны мәлімделді. Бұл ретте басымдық Қытайдан жеткізілетін өнімдерге беріледі.

Сонымен қатар, Премьер-министр Олжас Бектенов шекарадағы бақылауды күшейтуді және жанар-жағармай тапшылығына жол бермеу үшін барлық шараларды қабылдауды тапсырған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз