Қызылорда облысында қызанақ өңдеу жобасына 2,3 млрд теңге инвестиция салынады
Alpecon Group Жаңақорған ауданындағы зауытты жаңғыртуды жоспарлап отыр
Қызылорда облысының әкімі Мұрат Ергешбаев Alpecon Group компаниясының өкілдері Самат Балабеков, Ержан Ибраимов және Нармұхан Сарыбаевпен Бесарық ауылындағы зауытты жаңғырту жобасын талқылады. Инвестиция көлемі 2,3 млрд теңгені құрайтын жоба тәулігіне 600 тоннаға дейін қызанақ өңдеуге мүмкіндік береді. Бұл туралы Kapital.kz іскерлік ақпарат орталығының тілшісі хабарлайды.
«Бүгінде өңірде ауыл шаруашылығы өнімдерін қайта өңдеуге басымдық беріліп отыр. Осыған байланысты Жаңақорған ауданында томат пастасын өндіретін зауыт салу жөніндегі бастамаңызды қолдаймыз. Бұл өнімнің қосылған құнын арттырып қана қоймай, көкөніс шаруашылығын дамытуға және егіс алқаптарын ұлғайтуға мүмкіндік береді. Біз қажетті жер телімін бөліп, жобаның барлық кезеңінде әкімшілік және инфрақұрылымдық қолдау көрсетуге дайынбыз. Өңір үшін стратегиялық маңызы бар бұл инвестициялық жоба жан-жақты қолдауға ие болады», – деді Мұрат Ергешбаев.
Инвесторлар «ATMO AGRO» ЖШС-нің зауытын сатып алып, оның базасында томат пастасын өндіруді жоспарлап отыр. Жоба аясында технологиялық жабдық жаңартылып, өндірістік және қосалқы нысандар жөнделеді, сондай-ақ арнайы техника сатып алынады.
Шикізатпен қамтамасыз ету үшін компания 2 300 гектар суармалы жерді игеруді, сондай-ақ Түркістан облысынан қызанақ сатып алуды жоспарлап отыр.
Еске салайық, бұған дейін Алматы облысында жеміс-жидек пен көкөніс өңдеуге маманданған Qazaq Global Food JV зауыты іске қосылған болатын. Жобаға салынған инвестиция көлемі 9,5 млрд теңгені құрайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
