ЕҚҚДБ Solidcore Resources компаниясына 300 млн доллар несие береді
Қаражат Павлодар облысында отқа төзімді концентратты өңдейтін зауыт құрылысына бағытталады
Еуропалық қайта құру және даму банкі (ЕҚҚДБ) Solidcore Resources компаниясына 300 млн доллар көлемінде несие береді. Қаражат Орталық Азиядағы алғашқы отқа төзімді концентратты өңдеу зауытын іске қосуға бағытталады. Бұл туралы Kapital.kz іскерлік ақпарат орталығы банктің баспасөз қызметіне сілтеме жасап хабарлайды.
«ЕҚҚДБ SR компаниясы мен оның толық иелігіндегі еншілес кәсіпорны – «Ертіс гидрометаллургиялық комбинатына» Павлодар облысында қысыммен тотықтыру технологиясы қолданылатын «Ертіс» гидрометаллургиялық кешенін салуға 300 млн долларға дейін (263 млн еуро) несие береді. Кешен жылына 278,5 мың тоннаға дейін алтын концентратын өңдей алады және SR компаниясының шетелдік өңдеу кәсіпорындарына тәуелділігін төмендетеді», – делінген хабарламада.
ЕҚҚДБ жобаның негізгі кредиторы болады. Ал Abu Dhabi Commercial Bank, ING Bank және Société Générale бірлескен кредиторлар ретінде қатысады.
Кәсіпорында отқа төзімді және қосарланған отқа төзімді алтын концентраттары өңделіп, доре қорытпасы (жартылай тазартылған алтын қорытпасы) өндіріледі.
«Жоба іске асқаннан кейін Қазақстанда жаңа металлургия бағыты қалыптасады. Бұл тау-кен өндіру секторындағы қосылған құны жоғары өнім өндірісін ұлғайтуға мүмкіндік береді. Аталған сектор елдің жалпы ішкі өнімінің 12%-ын қалыптастырып, шикізат экспортының шамамен үштен бірін қамтамасыз етеді», – деп атап өтті ЕҚҚДБ.
Жоба аясында SR гидрометаллургия саласындағы ресурсты тиімді пайдаланатын, экологиялық қауіпсіз әрі сенімді технологиялардың бірі саналатын қысыммен тотықтыру технологиясын енгізеді. Компания бұған дейін осыған ұқсас жобаларда қолданған бұл технология Қазақстандағы алтын қорының шамамен жартысын құрайтын күрделі отқа төзімді кендерді игеруге қажетті инфрақұрылымды дамытуға мүмкіндік береді.
Жобаға Жасыл климат қоры мен ЕҚҚДБ техникалық қолдау көрсетеді. Бұл қаржы SR компаниясына климаттық корпоративтік басқару жүйесін жетілдіруге және экологиялық, әлеуметтік әрі корпоративтік басқару (ESG) бағытындағы есептілік тәжірибесін жергілікті талаптардан жоғары деңгейге шығаруға мүмкіндік береді.
Бүгінде ЕҚҚДБ Қазақстанда жалпы көлемі шамамен 12,8 млрд долларды (11 млрд еуро) құрайтын 354 жобаны қаржыландырды. Қазақстан Орталық Азиядағы ЕҚҚДБ инвестициясының ең ірі әрі ең ұзақ мерзімді алушысы саналады.
Бұған дейін Еуропалық қайта құру және даму банкі 2026 жылы Қазақстанға салатын инвестиция көлемін 1,3 млрд еуроға дейін ұлғайтуды жоспарлап отырғаны хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
