• Басты бет
• Экономика
• Қазақстан 2027 жылдан бастап электр энергиясына ішкі сұранысты толық қамтамасыз етуді жоспарлап отыр

Қазақстан 2027 жылдан бастап электр энергиясына ішкі сұранысты толық қамтамасыз етуді жоспарлап отыр

2029 жылға дейін елде 13,3 ГВт жаңа энергетикалық қуат іске қосылады

Қазақстан 2027 жылдың басынан бастап экономиканың электр энергиясына деген ішкі қажеттілігін толық қамтамасыз етіп, кейін профицитке шығуды жоспарлап отыр. Бұл туралы үкімет отырысында энергетика министрі Ерлан Ақкенженов мәлімдеді, деп хабарлайды үкіметтің баспасөз қызметі.

Министрдің айтуынша, бүгінде еліміздің энергетикалық жүйесіне белгіленген жалпы қуаты 27,1 ГВт болатын 254 энергия көзі кіреді. Оның ішінде жаңартылатын энергия көздерінің (ЖЭК) 172 нысаны бар. Өткен жылдың қорытындысы бойынша электр энергиясын өндіру көлемі тарихи максимумға жетіп, 123,1 млрд кВт/сағатты құрады. Ал тұтыну көлемі 124,6 млрд кВт/сағат болған.

«Жаңа қуаттардың іске қосылуы 2027 жылдың басынан бастап экономиканың электр энергиясына деген қажеттілігін толық қамтамасыз етіп, кейін профицит қалыптастыруға мүмкіндік береді. 2029 жылға дейін жоспарланған қосымша генерация электр энергиясына деген ішкі сұранысты толық өтеуге, сондай-ақ жасанды интеллект инфрақұрылымы мен ірі деректерді өңдеу орталықтарын (ЦОД) орналастыруға қажетті қуат резервін қалыптастырады», – деді Ерлан Ақкенженов.

2029 жылдың соңына дейін елде жалпы қуаты 13,3 ГВт болатын энергетикалық нысандар пайдалануға беріледі. Оның 12,56 ГВт-ы жаңа генерацияға тиесілі.

2035 жылға дейінгі саланы дамыту жоспары аясында жалпы 26,3 ГВт жаңа қуатты іске қосу көзделген. Оның ішінде қолданыстағы станцияларды жаңғырту, қуаты 10,5 ГВт болатын жаңа генерация нысандарын салу, жаңартылатын энергия көздері жобаларын жүзеге асыру және атом электр станциясын іске қосу жоспарланып отыр.

Сонымен қатар елімізде «Көмір генерациясын дамыту» ұлттық жобасы жүзеге асырылып жатыр. Оның аясында «таза көмір» технологияларын қолданатын жалпы қуаты 7,8 ГВт болатын 19 жоба іске асырылады. Қазіргі таңда Екібастұз ГРЭС-3, Курчатов қаласындағы жылу электр станциясы, сондай-ақ Көкшетау, Семей және Өскемен қалаларындағы үш ЖЭО құрылысы белсенді кезеңге өтті.

Бұған дейін президент Қасым-Жомарт Тоқаев алдағы үш жыл ішінде Көкшетау, Семей және Өскемен қалаларындағы үш жаңа жылу электр орталығының құрылысын аяқтауды тапсырған болатын. Көкшетаудағы ЖЭО құрылысын 2029 жылдың наурызында аяқтау жоспарланып отыр.

Еске салайық, Мемлекет басшысы Ұлттық құрылтайдың V отырысында Қазақстанның шамамен 33 млрд тонна көмір қоры бар екенін айтып, көмір генерациясын дамытуға ұлттық жоба мәртебесін беруді тапсырған еді. Осы тапсырмаға сәйкес, 2026 жылдың наурызында «Көмір генерациясын дамыту» ұлттық жобасы бекітілді. Жаңа станциялар салу мен қолданыстағы нысандарды жаңғыртуға 7,5 трлн теңге инвестиция тарту жоспарланған.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз