Үкімет ең төменгі жалақыны көтеру мәселесін күзде қарайды
Серік Жұманғариннің айтуынша, ең төменгі жалақыны арттыру келесі жылдың бюджетінде қарастырылуы мүмкін, алайда нақты мөлшері әзірге талқыланып жатыр
Премьер-министрдің орынбасары – ұлттық экономика министрі Серік Жұманғарин үкіметтегі брифингте ең төменгі жалақыны (ЕТЖ) көтеру мүмкіндігіне қатысты пікір білдірді. Оның айтуынша, 2020 жылғы экономикалық құлдырауға қарамастан, сол кезеңде халықтың нақты табысы 2019 жылмен салыстырғанда өскен. Алайда мұндай өсімнің кері әсері де бар екенін айтты, деп хабарлайды Kapital.kz іскерлік ақпарат орталығы.
«Бұл неге әкелді? Инфляцияға әкелді. Әрине, ерте ме, кеш пе, инфляция халықтың нақты табысын «жеп қояды». Қазір соны байқап отырмыз. Экономика өсіп жатыр, бірақ халықтың нақты табысы төмендеуде. Бірнеше жыл бұрын бюджет саласы қызметкерлерінің жалақысын 30%-ға көтердік. Экономиканың түрлі секторларында да еңбекақы өсіп жатыр. Бұл нені көрсетеді? Кешенді тәсіл қажет екенін көрсетеді. Жалақыны жай ғана көтеру арқылы мәселе шешілмейді. Экономика салаларындағы еңбек өнімділігін арттырып, тұрақты жұмыс орындарын құру қажет. Соған қарамастан, бұл бағыттағы нақты норманы да қарастырдық. Келесі жылдың бюджетінде ең төменгі жалақыны арттыру бойынша белгілі бір шешімдер қабылдануы мүмкін. Қазір оның қаншалықты және қалай өсетінін айқындап жатырмыз», – деді ол.
Министрдің айтуынша, ең төменгі жалақыны арттырудың нақты параметрлері әзірге талқылану үстінде, түпкілікті шешім қабылданған жоқ.
Бұған дейін үкімет 2027 жылға арналған бюджетті есептеуге қажетті барлық статистикалық деректер алынғаннан кейін ең төменгі жалақының ықтимал жаңа мөлшерін айқындай алатыны хабарланған болатын.
Еске салайық, 2025 жылғы қарашада премьер-министрдің орынбасары – ұлттық экономика министрі Серік Жұманғарин Қазақстанда ең төменгі жалақыны көтеру мәселесі 2027–2028 жылдары қаралатынын мәлімдеген еді. Ал 2026 жылғы сәуірде ұлттық экономика вице-министрі Азамат Әмрин алдағы уақытта ең төменгі жалақыны 150 мың теңгеге дейін көтеру мәселесі қарастырылмайтынын, өйткені бұл шешім республикалық бюджеттің жағдайына тікелей байланысты екенін және ағымдағы қаржы жылының қорытындысына қарай қабылданатынын айтқан болатын.
Айта кетейік, 2026 жылы Қазақстанда ең төменгі жалақы мөлшері айына 85 мың теңгені құрайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
