• Басты бет
• Экономика
• Қазақстан әуежайларындағы коммерциялық орындар енді тек конкурс арқылы жалға берілмек

Қазақстан әуежайларындағы коммерциялық орындар енді тек конкурс арқылы жалға берілмек

Жаңа тәртіп әуежай мүлкін тиімді пайдалануға және жалға беру үдерісінің ашықтығын арттыруға бағытталған

Қазақстан әуежайларындағы коммерциялық алаңдарды жалға беру енді міндетті түрде конкурс арқылы жүзеге асырылады, деп хабарлайды Kapital.kz іскерлік ақпарат орталығы Жоғары аудиторлық палатаның баспасөз қызметіне сілтеме жасап.

«Қазақстан Республикасы Жоғары аудиторлық палатасының нұсқамасы негізінде әуежайлар аумағында коммерциялық қызмет жүргізу қағидаларына өзгерістер енгізілді. Енді кәсіпкерлердің жалға берілетін орындарға қол жеткізуі бірыңғай конкурстық талаптармен реттеледі», – делінген хабарламада.

Палата мәліметінше, мұндай өзгерістердің қажеттілігі Астана қаласында мемлекеттік ресурстарды пайдалану тиімділігіне жүргізілген аудит барысында анықталған. Тексеру қорытындысы бойынша Жоғары аудиторлық палата Көлік министрлігіне әуежайлар (әуеайлақтар) аумағындағы әуежай қызметіне жатпайтын нысандарға қол жеткізу және қызмет көрсету қағидаларына өзгерістер енгізуді тапсырған.

Атап айтқанда, қоғамдық тамақтану орындарына, азық-түлік сататын автоматтар мен багажды орау қызметіне арналған жалға беру алаңдарын тек конкурстық негізде ұсыну тәртібі бекітілді.

«Конкурстық іріктеу барлық әлеуетті жалға алушылар үшін ашық әрі тең жағдай қалыптастырады, қызмет көрсетушілерді негізсіз таңдауға байланысты тәуекелдерді азайтып, әуежай мүлкін пайдалану тиімділігін арттырады. Сонымен қатар ең тиімді ұсыныстарды іріктеу жалға беруден түсетін әуежайлардың өз кірістерін көбейтеді», – деп есептейді мемлекеттік аудиторлар.

Еске салайық, бұған дейін мемлекеттік аудиторлар Алматы әуежайында 6,8 млрд теңге көлемінде дивидендтердің заңсыз төленгенін анықтаған болатын. Сондай-ақ 2025 жылдың қаңтарында монополияға қарсы органның ескертуінен кейін Алматы әуежайында тарифті көтеру тоқтатылса, Семей әуежайында авиаотынның бөлшек сауда бағасы негізсіз жоғары белгіленгені анықталған.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз