Экономика өссе де, қазақстандықтардың нақты табысы неге артпады
Премьер-министрдің айтуынша, инфляция халықтың сатып алу қабілетіне кері әсер еткен
2025 жылдың қорытындысы бойынша Қазақстан экономикасы 6,5%-ға өскенімен, халықтың нақты табысы төмендеді. Макроэкономикалық көрсеткіштер мен азаматтардың тұрмыс деңгейі арасындағы бұл айырмашылықтың себептерін премьер-министр Олжас Бектенов парламент палаталарының бірлескен отырысында депутаттардың сауалына жауап беру кезінде түсіндірді, деп хабарлайды Kapital.kz іскерлік ақпарат орталығы.
Бұл мәселені сенат депутаты Сергей Карплюк көтерді. Оның айтуынша, Қазақстан экономикасының өсімі әлемдік орташа көрсеткіштен екі еседен астам жоғары болғанымен, Ұлттық статистика бюросының дерегіне сәйкес халықтың нақты табысы 2%-ға төмендеп, инфляция 12%-дан асқан.
«Бәріміз білеміз, 2025 жылдың қорытындысы бойынша экономикамыз 6,5%-ға өсті. Ал әлемдік экономика шамамен 3%-ға ғана өсті. Бірақ азаматтарды басқа мәселе алаңдатады. Егер экономика өссе, неге Ұлттық статистика бюросының мәліметінше, халықтың нақты табысы 2%-ға азайып, инфляция 12%-дан асты? Үкімет бұл бағытта қандай шаралар қабылдап жатыр?» – деп сұрады Сергей Карплюк.
Жауап берген премьер-министр жалпы ішкі өнімнің өсуі мемлекеттік саясаттың түпкі мақсаты емес екенін айтты. Оның сөзінше, экономикалық өсім халықтың әл-ауқатын арттырудың құралы ретінде қарастырылады.
«Бірден айтайын, үкімет экономиканың өсуін өз алдына мақсат деп қарастырмайды. Бұл – басты мақсатымызға, яғни барлық қазақстандықтың әл-ауқатын арттыруға жетудің құралы ғана. Бірақ бұл өте маңызды құрал. Сондықтан негізгі мақсатқа жету үшін экономиканың қарқынды өсуін қамтамасыз етуіміз қажет», – деді Олжас Бектенов.
Оның айтуынша, пандемиядан кейін Қазақстан экономикасы жыл сайын шамамен 5% деңгейінде тұрақты өсіп келеді. Үкімет бұл қарқынды сақтап, іскерлік белсенділікті, инвестициялар мен өндірісті ынталандыру шараларын жалғастырмақ.
Сонымен қатар премьер-министр өткен жылы экономикалық өсім жоғары инфляциямен қатар жүргенін және бұл халықтың сатып алу қабілетіне кері әсер еткенін мойындады. Оның айтуынша, инфляция ең жоғары деңгейіне 2025 жылдың қыркүйегінде жеткен.
«Өткен жылы қарқынды экономикалық өсіммен қатар жоғары инфляциялық қысымға тап болдық. Қыркүйек айында инфляция 12,9%-ға дейін жетті. Қазір үкіметтің, Ұлттық банктің және басқа да мүдделі құрылымдардың қабылдап жатқан шараларының нәтижесінде биылғы бес айдың қорытындысы бойынша инфляция 10,4%-ға дейін төмендеді», – деді үкімет басшысы.
Премьер-министрдің айтуынша, үкімет Ұлттық банкпен бірлесіп инфляцияны тежеу бағытындағы жұмысты жалғастырып жатыр. Оның пікірінше, баға өсімінің баяулауы уақыт өте келе халықтың нақты табысына оң әсер етеді. Ал экономиканың одан әрі дамуы азаматтардың әл-ауқатын арттырудың негізгі шарттарының бірі болып қала береді.
Еске салайық, 2025 жылдың қарашасында премьер-министрдің орынбасары – ұлттық экономика министрі Серік Жұманғарин Қазақстанда ең төменгі жалақыны көтеру мәселесі 2027–2028 жылдары қаралатынын мәлімдеген болатын. Ал 2026 жылдың сәуірінде ұлттық экономика вице-министрі Азамат Әмрин ең төменгі жалақыны жақын арада 150 мың теңгеге дейін көтеру әзірге қарастырылмайтынын, өйткені бұл шешім республикалық бюджеттің жағдайына тікелей байланысты екенін айтқан еді.
Сондай-ақ Азамат Әмрин Қазақстанда ең төменгі жалақының ықтимал жаңа мөлшері 1 тамыздан кейін есептелетінін хабарлаған болатын.
Айта кетейік, 2026 жылы ең төменгі жалақы мөлшері 85 мың теңгені құрайды.
Ұлттық экономика министрлігі халықтың нақты табысын арттыру жөніндегі кешенді жоспардың жобасын әзірледі. Құжатта алты бағыт бойынша 58 іс-шара көзделген:
• жалақыны арттыру;
• сапалы жұмыс орындарын құру;
• адами капиталды дамыту және жұмыспен қамтуды арттыру;
• инфляцияны төмендету және нақты табысты өсіру;
• салықтық және әлеуметтік шаралар;
• халықтың борыштық жүктемесін азайту және қаржылық тұрақтылығын күшейту.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
