Қарашығанақтағы газ өндірудің қысқаруы елді газбен қамтуға әсер еткен жоқ
Энергетика министрлігі ішкі тұтынушылар алдындағы барлық міндеттемелер толық орындалып жатқанын мәлімдеді
Энергетика министрі Ерлан Ақкенженов Қарашығанақ мұнай-газ конденсаты кен орнындағы газ өндіру көлемі түзетілгенін мәлімдеді. Оның айтуынша, өндіріс көлемі 34 мың тоннадан 25 мың тоннаға дейін қысқарған, деп хабарлайды Kapital.kz іскерлік ақпарат орталығы.
Министрдің түсіндіруінше, өндірістің төмендеуі газ қабылдау көлемінің азаюына алып келгенімен, бұл ішкі тұтынушыларды газбен қамтамасыз етуге әсер етпеген.
«Яғни қысқару көлемі – 9 мың тонна. Соған сәйкес қазіргі таңда газ қабылдау көлемі де азайды. Бірақ Қазақстанды газбен қамтамасыз етуге бұл әсер еткен жоқ. Бүгінде газ жеткізу бойынша барлық міндеттемелерімізді толық көлемде орындап отырмыз», – деді Ерлан Ақкенженов парламент палаталарының бірлескен отырысы кулуарында.
Энергетика министрінің айтуынша, Қарашығанақ кен орнындағы өндірістің төмендеуіне қарамастан, қолданыстағы газ жеткізу жүйесі тұрақты жұмыс істеп тұр және елді табиғи газбен қамтамасыз ету бойынша барлық міндеттемелер толық орындалуда.
Бұған дейін Қазақстан Орынбор газ өңдеу зауытындағы оқиғаға байланысты газ жеткізу логистикасын қайта қарап, отынға деген қажеттілікті өзге көздер есебінен жауып жатқаны хабарланған болатын. 24 маусымда Орынбор газ өңдеу зауыты украиналық ұшқышсыз ұшу аппараттарының шабуылына ұшырады.
Еске салайық, «Газпром» мен «ҚазМұнайГаз» 2002 жылдан бері «ҚазРосГаз» бірлескен кәсіпорны аясында ынтымақтасып келеді. Бұл кәсіпорын Қарашығанақ кен орнынан өндірілген газды сатып алып, оны Орынбор газ өңдеу зауытында өңдеп, кейін Қазақстан мен Ресей тұтынушыларына өткізу үшін құрылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
