Ресейден бензин жеткізуге сұраныс түскен жоқ – Энергетика министрлігі
Ведомство Ресейден ресми өтініш түскен жағдайда ғана бұл мәселе қаралатынын мәлімдеді
Энергетика министрі Ерлан Ақкенженов Қазақстанның Ресейге бензин жеткізу жөнінде келіссөз жүргізіп жатқаны туралы ақпаратты жоққа шығарды. Оның айтуынша, бүгінгі күнге дейін Ресей тарапынан министрлікке ресми өтініш түспеген, деп хабарлайды Kapital.kz іскерлік ақпарат орталығы.
«Ресей тарапынан бізге ешқандай ресми сұраныс түскен жоқ», – деді Ерлан Ақкенженов үкімет кулуарында журналистерге.
Министрдің айтуынша, бұл мәселе Ресейден тиісті өтініш түскен жағдайда ғана қаралуы мүмкін.
«Егер сұраныс түссе, онда қараймыз», – деп қосты ведомство басшысы.
Бұған дейін Reuters агенттігі дереккөздеріне сілтеме жасап, Ресейдің Қазақстаннан шамамен 50 мың тонна АИ-92 маркалы бензин импорттау мүмкіндігін талқылап жатқанын хабарлаған болатын. Агенттіктің мәліметінше, бұл қажеттілік Ресейдегі бірқатар мұнай өңдеу зауыттарының уақытша тоқтауы мен жоспардан тыс жөндеу жұмыстары салдарынан туындаған жанармай тапшылығына байланысты.
Еске салайық, Қазақстан Еуразиялық экономикалық одаққа кірмейтін елдерден әкелінетін жанар-жағармайға салынатын импорттық баж салығын уақытша алып тастау мүмкіндігін қарастырып жатыр. Негізгі назар Қытайдан жеткізілетін жанармайға аударылған. Сондай-ақ премьер-министр Олжас Бектенов шекарадағы бақылауды күшейтіп, ел ішінде жанармай тапшылығына жол бермеу жөнінде тапсырма берген болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
