• Басты бет
• Экономика
• Маңғыстау облысындағы шағын мұнай өңдеу зауыты есепке алынбаған мұнайды жасырын түрде өңдеп келген

Маңғыстау облысындағы шағын мұнай өңдеу зауыты есепке алынбаған мұнайды жасырын түрде өңдеп келген

Зауыттан шыққан мұнай өнімдері шетелге мазут түрінде экспортталған

Маңғыстау облысында 28 мың тоннадан астам есепке алынбаған мұнайды өңдеген заңсыз шағын зауыт анықталды, деп хабарлайды Kapital.kz іскерлік ақпарат орталығы Қаржылық мониторинг агенттігінің баспасөз қызметіне сілтеме жасап.

Ведомствоның мәліметінше, жыл басынан бері Қазақстанда жанар-жағармай материалдарын ел аумағынан тыс жерлерге заңсыз алып шығудың 712 әрекетіне тосқауыл қойылды. Мұнай өнімдерінің заңсыз айналымы мен контрабандасы фактілері бойынша сотқа дейінгі 8 тергеп-тексеру ісі басталды.

Мәселен, Маңғыстау облысында 2022 жылдан бері 28,5 мың тоннадан астам есепке алынбаған мұнайды өңдеп келген заңсыз шағын зауыттың қызметі әшкереленді. Өндірілген өнім шетелге мазут түрінде жөнелтіліп отырған.

Түркістан облысында мемлекеттік шекараның астынан арнайы қазылған туннель арқылы Өзбекстан Республикасына бензинді контрабандалық жолмен тасымалдауды ұйымдастырған трансұлттық қылмыстық топтың әрекеті тоқтатылды. Осы іс бойынша кінәлі тұлғалар ұзақ мерзімге бас бостандығынан айыру жазасына кесілді.

Бұдан бөлек, Қырғыз Республикасына АИ-92 бензинін контрабандалық жолмен тасымалдаумен айналысқан қылмыстық топқа қатысты тергеу аяқталды. Заңсыз шығарылған отынның жалпы көлемі 190 мың тоннадан асқан, ал оның құны — 37 миллиард теңге.

Кезекті рет шекарадан асырмақ болған кезде «Түрксіб» станциясында көлемі 500 тоннаға жуық заңсыз бензин тиелген 8 теміржол цистернасы ұсталды. Құны 138 миллион теңге болатын тәркіленген бензин мемлекет меншігіне өткізілді.

Елдің экономикалық қауіпсіздігін қамтамасыз ету және отын тапшылығына жол бермеу мақсатында Агенттік мұнай өнімдерін заңсыз тасымалдау схемаларын анықтау мен олардың жолын кесу бағытындағы жүйелі жұмысты жалғастыруда.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз