• Басты бет
• Экономика
• Қазақстан «Ақтөбе – Ұлғайсын» тасжолын реконструкциялауға ЕҚДБ-дан 229,5 млрд теңге қарыз алады

Қазақстан «Ақтөбе – Ұлғайсын» тасжолын реконструкциялауға ЕҚДБ-дан 229,5 млрд теңге қарыз алады

Жоба «Design-Build-Maintain» моделі бойынша жүзеге асырылады

Брюссельде өткен Транскаспий халықаралық көлік бағытын дамыту жөніндегі халықаралық конференция аясында «ҚазАвтоЖол» компаниясы Еуропалық қайта құру және даму банкімен (ЕҚДБ) республикалық маңызы бар «Ақтөбе – Қарабұтақ – Ұлғайсын» автомобиль жолын реконструкциялау жобасын іске асыру туралы келісімге қол қойды. Бұл туралы Kapital.kz іскерлік ақпарат орталығы ұлттық компанияның баспасөз қызметіне сілтеме жасап хабарлайды.

«Еуропалық қайта құру және даму банкімен келісімге қол қою – елдегі ең ірі инфрақұрылымдық жобалардың бірін жүзеге асырудағы маңызды қадам. Бұл тек жолды жөндеу ғана емес, Қазақстанның транзиттік әлеуетін арттыруға, қозғалыс қауіпсіздігін қамтамасыз етуге, Ақтөбе облысын дамытуға және еліміздің Еуразиядағы басты көлік торабы ретіндегі рөлін нығайтуға құйылған инвестиция. Жоба аяқталғаннан кейін бұл учаске халықаралық дәліздің өткізу қабілетін арттыратын, сондай-ақ бизнес, логистика және аймақ тұрғындары үшін жаңа мүмкіндіктер туғызатын қазіргі заманғы төрт жолақты магистральға айналады», – деп атап өтті ұлттық компания басшысы Дархан Иманашев.

ЕҚДБ несиесінің сомасы 229,5 млрд теңгені құрайды. Бұл қаражат тасжолдың 763–791 және 819–1025 шақырым аралығындағы 234 шақырымдық учаскесін реконструкциялауға жұмсалады. Жол төрт жолақты қозғалысы бар, асфальтты бетон жабынды және есептік жылдамдығы сағатына 120 шақырымға дейін жететін І техникалық санатқа ауыстырылады. Жоба дәліздің өткізу қабілетін айтарлықтай арттырады. Есептеулер бойынша, жол жүру уақыты 1,4 сағатқа қысқарады.

Бұл учаске Еуропа, Орталық Азия және Қытай арасындағы көлік байланысын қамтамасыз ете отырып, «Батыс Еуропа – Батыс Қытай» халықаралық бағытына, Орталық Азия өңірлік экономикалық ынтымақтастығы бағдарламасының (CAREC) №1 дәлізіне және Е38 еуропалық бағытына кіреді.

Жобаның жалпы құны – 523 млрд теңге. Қаржыландыру Еуропалық қайта құру және даму банкі мен Азия инфрақұрылымдық инвестициялар банкінің қатысуымен жүзеге асырылады.

Есептеулер бойынша, 2048 жылға қарай көлік қозғалысының қарқындылығы 763–791 шақырымдық учаскеде тәулігіне 26 989 көлікке, ал 819–1025 шақырымдық учаскеде тәулігіне 11 492 көлікке жетеді.

Сонымен қатар, қазіргі заманғы зияткерлік көлік жүйелерін енгізу жоспарлануда. Олардың қатарында жол жүру ақысын электронды түрде алу; қозғалыс кезінде көлікті автоматты түрде өлшеу кешендері; ауа райы мен жол ахуалын бақылау жүйелері; жол активтерін басқару және қауіпсіздікті қамтамасыз ету жөніндегі цифрлық шешімдер бар. Жоба жолды жобалауды, салуды және кейіннен күтіп ұстауды қарастыратын «Design-Build-Maintain» (DBM) моделі бойынша жүзеге асырылады.

Жобаны іске асыру құрылыс кезеңінде 3 007 жұмыс орнын, ал жол пайдалануға берілгеннен кейін 124 тұрақты жұмыс орнын ашуға мүмкіндік береді. Жаңа жұмыс орындарын құрудан түсетін жиынтық экономикалық пайда 25,5 млрд теңгеге бағаланып отыр.

Көлік дәлізінің бойында қазіргі заманғы инфрақұрылым нысандары: қонақ үйлер, техникалық қызмет көрсету және автожанармай құю станциялары, кемпингтер мен қоғамдық тамақтану орындарын салу көзделген.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз