Қазақстанда рақымшылық бойынша 1 млн-нан астам айыппұл есептен шығарылады
ІІМ болжамы бойынша, бұл жарты миллионнан астам азаматқа қатысты болады
Қазақстанда әкімшілік рақымшылық аясында 17 млрд теңгеден астам сомаға 1 млн-нан астам айыппұлды есептен шығару жоспарланып отыр. Бұл туралы Мәжілістің жалпы отырысында ішкі істер министрінің орынбасары Санжар Әділов мәлімдеді, деп хабарлайды Kapital.kz іскерлік ақпарат орталығының тілшісі.
Оның мәліметінше, рақымшылық қолданысына 500 мыңнан астам адам ілігеді, ал ішкі істер органдары тарапынан қамту Әкімшілік құқық бұзушылық туралы кодекстің 58 бабына әсер етеді.
«Ең алдымен, ішкі істер органдары желісі бойынша бізде Әкімшілік құқық бұзушылық туралы кодекстің 58 бабы қамтылғанын атап өткім келеді. 500 мыңнан астам адам әкімшілік рақымшылыққа ілігеді. Алдын ала мәлімет бойынша, 17 млрд теңгеден астам сомаға 1 млн-нан астам айыппұл есептен шығарылады», — деді Санжар Әділов.
Ол амнистия бірқатар бұзушылықтар санаттарына таралмайтынын нақтылады. Олардың қатарында — есірткі мен қарудың заңсыз айналымына байланысты қылмыстар, сот шешімдерін орындамау, жол жүрісі қағидаларын қасақана бұзу, сондай-ақ қоғамдық қауіпсіздікке қатер төндіретін іс-әрекеттер бар.
Бұл ретте, министрдің орынбасары атап өткендей, есептен шығарылатын айыппұлдардың негізгі үлесі дәл осы жол жүрісі қағидаларын бұзушылықтарға тиесілі.
«Ішкі істер министрлігіне келетін болсақ, иә, төленбеген айыппұлдары есептен шығарылатын әкімшілік құқық бұзушылықтардың негізгі бөлігі — бұл жол жүру ережелерін бұзуға қатысты», — деп толықтырды Санжар Әділов.
Жағдайға байланысты қаржы вице-министрі Ержан Біржанов бөлек түсініктеме берді. Ол бұған дейін елде шағын және микробизнес субъектілері үшін амнистия жүргізілгенін, оның аясында кәсіпкерлер негізгі салық берешегін өтей алғанын, ал айыппұлдардың есептен шығарылғанын еске салды.
Оның айтуынша, ол кезде бұл шараны 17 мың кәсіпкер пайдаланған, ал өтелген берешек сомасы шамамен 13 млрд теңгені құраған. Бұл ретте есептен шығарылған айыппұлдардың көлемі шамамен 300 млн теңгеге жеткен.
«Бірақ бұл акция аясында шамамен 2370 субъект ілігуі мүмкін бірқатар баптар да қарастырылатын болады. Амнистияға мемлекеттік сатып алу бөлігіндегі, сондай-ақ салық салу бөлігіндегі – салық салу объектілерін қасақана жасыру бойынша бұзушылықтар ілікпейтінін атап өткім келеді», — деді Ержан Біржанов.
Бұған дейін қазақстандықтарға айыппұлдардың есептен шығарылғаны туралы СМС арқылы хабарланатыны белгілі болған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
