Қазақстанда электр энергиясының профициті 300 млн кВт/сағ жетті
Жаңа станциялар қашан іске қосылады?
Биылғы жылдың бес айында Қазақстанда электр энергиясын өндіру көлемі 53,6 млрд кВт/сағ құрады, ал тұтыну 53,3 млрд кВт/сағ деңгейіне жетті, деп хабарлайды Kapital.kz іскерлік ақпарат орталығы Энергетика министрлігіне сілтеме жасап.
Ведомство мәліметінше, электр энергиясын өндірудегі профицит шамамен 300 млн кВт/сағ құрады.
«Тұрақты профицит елдің энергетикалық жүйесінің теңгерімді дамуын, генерациялайтын қуаттардың тұрақты жұмысын және ішкі сұранысты сенімді қамтамасыз етуді көрсетеді», делінген министрлік ақпаратында.
2026 жылы электр энергиясын өндіру көлемін 126,5 млрд кВт/сағ деңгейінде қамтамасыз ету жоспарлануда
Биыл Қазақстанда дәстүрлі және жаңартылатын энергия көздері есебінен 2,6 ГВт қуат енгізілмек. Атап айтқанда 4 газ станциясын іске қосу, сондай-ақ екі электр станциясын кеңейту жоспарланған.
Сонымен қатар, 10 жаңа ЖЭК нысаны іске қосылады, оның ішінде 4 жел электр станциясы, 5 күн электр станциясы және 1 су электр станциясы бар.
Бұл жобаларды іске асыру 2027 жылдың бірінші тоқсанының соңына қарай елдегі энергия тапшылығы мәселесін толық шешуге, ал 2029 жылға қарай электр энергиясы бойынша тұрақты профицитке шығуға мүмкіндік береді, деді министрлікте.
Бұған дейін Энергетика министрігі Қазақстанда энергия жинақтайтын «алып пауэрбанктер» салынатынын хабарлады. Еліміздің энергия жүйесіне TotalEnergies, Masdar сынды компаниялар қатысып жатыр. Алматыда 145,5 млрд теңгеге қоқысты электр энергиясына айналдыратын зауыт салынады. Кәсіпорын тәулігіне 2 мың тонна қалдықты өңдеп, 60 МВт-қа дейін электр энергиясын өндіре алады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
