Жыл соңына дейін 27 жолаушылар бағыты Starlink және OneWeb интернетімен қамтылады
Республикалық және облыстық жолдар бойында жүздеген антенна-діңгек құрылысы салынуда
2026 жылдың соңына дейін Қазақстан темір жолының 27 жолаушылар бағыты сымсыз интернетпен қамтылады. Жол бойындағы тұрақты байланысты Starlink және OneWeb спутниктік жүйелері қамтамасыз етпек. Бұл туралы депутаттық сауалға берген жауабында премьер-министрдің орынбасары – цифрлық даму және жасанды интеллект министрі Жаслан Мәдиев мәлім етті, деп хабарлайды Kapital.kz іскерлік ақпарат орталығының тілшісі.
Ол Қазақстанда мобильді байланыс мүлде жоқ немесе сапасы төмен аумақтарды анықтау бойынша талдау жүргізілгенін еске салды.
«Жүргізілген талдау қорытындысы бойынша автомобиль жолдарының бойында антенна-діңгек құрылыстарын (АДҚ) салу жобасы басталды. Бірінші кезеңде 2026 жылдың соңына дейін республикалық маңызы бар автомобиль жолдарының бойында 243 АДҚ салу көзделген. Екінші кезеңде 2027 жылдың соңына дейін облыстық жолдар бойында тағы 244 АДҚ орнатылады. Республикалық бюджет шығындарын оңтайландыруды ескере отырып, жоба «Транстелеком» АҚ-мен жасалған инвестициялық келісім аясында инвестор тарту арқылы жүзеге асырылады. Сондай-ақ 2026 жылдың соңына дейін «Қазақстан темір жолы» АҚ OneWeb және Starlink төмен орбиталы спутниктік жүйелері технологиялары арқылы 27 жолаушылар бағдарын интернетпен қамтуды жоспарлап отыр», – делінген жауапта.
Жаслан Мәдиевтің айтуынша, елімізде елді мекендерден тыс орналасқан туристік аймақтар да бар. Осыған байланысты 2027-2028 жылдары 50 аумақты 4G мобильді интернетімен қамту жоспарланған.
Министр «Қолжетімді интернет» ұлттық жобасы аясында спутниктік технологиялар арқылы 505 ауылдық елді мекен интернетке қосылғанын атап өтті. Оның ішінде 329 ауыл – OneWeb, ал 176 ауыл Starlink жүйесі арқылы қамтылған. Сонымен қатар 2023 жылдан бері 1800-ден астам шалғай ауыл мектебі Starlink арқылы интернетке қосылды.
Ведомство сондай-ақ телекоммуникациялардың интерактивті цифрлық картасын әзірлеу жұмыстарын жүргізуде. Жоба 2026 жылдың соңына дейін іске асырылмақ.
«Бұл карта Қазақстан аумағындағы 2G, 3G, 4G және 5G байланыс желілерінің қамту аймағы мен сапа деңгейін, сондай-ақ талшықты-оптикалық байланыс желілерінің болуын көрсетеді. Карта нақты уақыт режимінде елді мекендердің, автомобиль жолдарының, туристік нысандардың және басқа да аумақтардың байланыспен қамтылуын анықтауға, сондай-ақ байланыс сапасы төмен немесе мүлде жоқ аймақтарды айқындауға мүмкіндік береді», – делінген жауапта.
Еске салайық, бұған дейін республикалық және облыстық жолдар 2027 жылы толық интернетпен қамтылатыны хабарланған болатын. Сондай-ақ 2026 жылдың соңына дейін 3 мыңнан астам ауыл жоғары жылдамдықтағы интернетке қосылып, спутниктік байланыс пен 5G желісі пойыздар, ұшақтар және автомобиль жолдарына кеңейтілетіні айтылған. Сонымен қатар Қытайдың Shanghai SpaceSail компаниясының 2026 жылы Қазақстан нарығына шығуы бойынша келіссөздер жүргізіліп жатқаны белгілі болды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
