Қазақстандықтарға сапасыз тауарлар үшін 405 млн теңге қайтарылды
Бизнеске қатысты 400-ден астам әкімшілік іс қозғалды
2026 жылдың алғашқы үш айында Тұтынушылардың құқықтарын қорғау комитеті қазақстандықтардан түскен 22 мыңнан астам өтінішті қарады. Оның ішінде 7,3 мың өтініш немесе 32,6% бойынша тұтынушылардың талаптары қанағаттандырылған. Тағы 7,2 мың өтініш немесе 32% бойынша азаматтарға құқықтық көмек көрсетіліп, түсіндіру жұмыстары жүргізілген. Бұл туралы ОКҚ алаңында комитет төрағасы Болат Танабергенов мәлім етті, деп хабарлайды ortcom.kz.
Қосымша 5,7 мың өтініш немесе 25% салалық мемлекеттік органдарға жолданған. Қазіргі уақытта 2,5 мың өтініш немесе 11% қаралу үстінде немесе өтініш иелері тарапынан кері қайтарылған.
«Биылғы жылдың бірінші тоқсанында аумақтық департаменттер кәсіпкерлік субъектілеріне 308 тексеру жүргізді. Мемлекеттік бақылау шараларының ең көбі Астана және Алматы қалаларында, сондай-ақ Түркістан және Алматы облыстарында өтті. Тексеру қорытындысы бойынша бизнес субъектілеріне қатысты жалпы сомасы 12 млн теңгеге 430 әкімшілік іс қозғалды. Жүргізілген жұмыстар нәтижесінде биылғы алғашқы үш айда тұтынушылардың құқықтары қорғалып, тауарларды қайтару, айырбастау және ауыстыру бойынша жалпы 405 млн теңге өтелді», – деді ол баспасөз конференциясында.
Еске салайық, бұған дейін Қаржы нарығын реттеу және дамыту агенттігі екінші деңгейлі банктер үшін клиент-жеке тұлғалардың құқықтары мен мүдделерін қорғауға арналған арнайы бөлімшелер құру талабын енгізген болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
