Өзбекстан Қазақстаннан астық пен ұнды шамамен 40%-ға көп сатып алды
Шетел нарықтарына 11,7 млн тонна өнім астық эквивалентінде жөнелтілді
Қазақстан бір жыл ішінде астық пен ұн экспортын 13,6%-ға арттырып, шетел нарықтарына астық эквивалентінде 11,7 млн тонна өнім жеткізді, деп хабарлайды Kapital.kz іскерлік ақпарат орталығы ауыл шаруашылығы министрлігінің баспасөз қызметіне сілтеме жасап.
Қазақстан темір жолы деректері негізінде 2025 жылғы қыркүйектен 2026 жылғы 20 мамырға дейін астық пен ұн экспорты 11,7 млн тоннаны құрады. Бұл өткен жылдың сәйкес кезеңімен салыстырғанда 13,6%-ға артық (10,3 млн тонна).
Экспорт көлемінің өсімі негізінен Орталық Азия елдері мен Ауғанстан бағытында байқалған. Атап айтқанда, Өзбекстанға жеткізілім 39,5%-ға артып, 3,5 млн тоннадан 4,8 млн тоннаға жетті. Қырғызстанға экспорт 1,5 есеге көбейіп, 297 мың тоннадан 457 мың тоннаға дейін өсті.
Ауғанстанға жөнелтілім 2,3 есеге ұлғайып, 1,3 млн тоннадан 3 млн тоннаға жетті. Түрікменстанға экспорт көлемі 47,7%-ға артып, 130 мың тоннадан 192 мың тоннаға дейін өскен.
Бұған дейін Балтық елдерінің порттары арқылы қазақстандық астық экспорты 2025 жылы 6 еседен астам өсіп, 802 мың тоннаға жеткені хабарланған. Сонымен қатар 2026 жылы елімізде егіс алқаптарының жалпы көлемі 23,8 млн гектарды құрайды деп жоспарлануда. Бұл 2025 жылмен салыстырғанда 180 мың гектарға көп.
Егіс құрылымын әртараптандыру аясында астық дақылдарының көлемі 15,9 млн гектарға дейін қысқартылуда (112,4 мың гектарға аз), оның ішінде бидай алқабы 12,1 млн гектарды құрайды (өткен жылы 12,2 млн гектар болған).
Үкімет экспорттаушыларды қолдау үшін қосымша 7 млрд теңге бөлген. Қаражат тасымал шығындарын субсидиялау бағдарламасы бойынша мемлекет міндеттемелерін толық өтеуге және басым экспорттық нарықтарға жеткізілімді ынталандыруға бағытталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
