Абай облысында арнайы экономикалық аймақ құрылады
Аумағы бастапқы кезеңде 600 гектарды құрап, кейін 1000 гектарға дейін кеңейтіледі
Қазақстан Республикасы Үкіметі Абай облысы аумағында арнайы экономикалық аймақ (АЭА) құру бастамасын қолдады. Бастапқы кезеңде оның аумағы 600 гектарды құрап, кейін 1000 гектарға дейін кеңейту жоспарланған, деп хабарлайды Kapital.kz іскерлік ақпарат орталығының тілшісі Абай облысы әкімдігі баспасөз қызметіне сілтеме жасап.
АЭА-ның басым бағыттары ретінде агроөнеркәсіп кешені, логистика, көлік-хаб қызметтері және өңдеу өнеркәсібі айқындалған. Аймақ аумағында бірқатар ірі инвестициялық жобаларды іске асыру көзделіп отыр.
Абай облысы әкімі Берік Уәли айтуынша, 2025 жылдың басынан бері өңірдің инвестициялық пулына енгізілген жобалар саны 29-дан 112-ге дейін артқан, ал инвестиция көлемі 2,2 трлн теңгеден 4,3 трлн теңгеге дейін өскен.
2026 жылы жалпы құны 131,2 млрд теңгені құрайтын 41 инвестициялық жобаны іске асыру жоспарланып отыр. Нәтижесінде 3 мыңнан астам жаңа жұмыс орны ашылады.
Инвесторлар тарапынан өндірістік нысандарға сұраныстың артуына байланысты «Өндіріс» индустриялық аймағының аумағы 96 гектардан 190 гектарға дейін кеңейтілді. Сондай-ақ шағын және орта бизнеске арналған шағын өнеркәсіп паркін құру мүмкіндігі қарастырылуда.
Бұған дейін Абай облысы делегациясы түркиялық Miryildiz KZ Ltd компаниясымен ынтымақтастық туралы меморандумға қол қойған болатын. Құжаттың негізгі мақсаты – инвестициялық әріптестікті дамыту және «Жанан» кен орнындағы руда өңдеу бойынша алтын өндіру фабрикасын салу.
Сонымен қатар Hexo Hotels Group Семей қаласында қонақүй кешенін салуды жоспарлап отыр. Қалада тұрғын үй құрылысына қытай инвесторларын тарту да көзделуде.
Абай облысы Өңірлік кеңесі жалпы құны 1,2 трлн теңгені құрайтын инвестициялық жобаларды мақұлдаған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
