Түркістан облысында қандай зауыттар салынады
Өңірде ауыл шаруашылығы техникасын, трансформатор бөлшектерін және мақта майын шығару жоспарланып отыр
Түркістан облысының әкімі Нұралхан Көшеров инвестициялық штабтың отырысын өткізді, онда «TURAN» АЭА мен Түркістан үшін 2026 жылы іске асырылуы жоспарланған ірі өнеркәсіптік бастамалар таныстырылды, деп хабарлайды Kapital.kz іскерлік ақпарат орталығы әкімдіктің баспасөз қызметіне сілтеме жасап.
«Әрбір аудан, қала әкімі және бейінді басқарма басшысы инвестиция тарту жұмысын басымдыққа айналдыруы тиіс. Бүгін отырыста мәселелер ашық айтылып, олар бойынша тиісті шешімдер қабылдануда. Біз әрбір жобаның жүзеге асырылу барысын мұқият бақылап, туындаған мәселелерді шешуде қолдау көрсететін боламыз. Сіздердің жобаларыңыз өмірге еніп, облысымыздың экономикасын дамытудың драйверіне айналады деп сенеміз», - деп атап өтті Нұралхан Көшеров.
Штаб отырысында Түркістанның АЭА-да іске асыру үшін жоба ұсынылды. Мұнда ПВХ құбырларына арналған арматура мен таспаларды, тамшылатып суғару құбырларын шығаратын жабдықтарды, суға арналған тоқылған шлангтарды шығару жоспарланып отыр.
Сауран ауданындағы «TURAN» АЭА үшін де жобалар ұсынылды: BOSHIRAN XINJIANG компаниясынан ауыл шаруашылығы техникасын құрастыру және шығару; «Lihua Group» ЖШС-нен карбамид тыңайтқыштары мен мақта майын өндіретін зауыттар; BAKS Innovations Inc. - CAESG Platform компаниясынан биомассаны терең өңдеу және көміртекті байланыстыру бойынша инновациялық кешен бар.
Сондай-ақ «Yassy Energy» ЖШС-нің жобасы – трансформаторларға арналған гофрленген қабырғалар, қақпақтар мен магнитөткізгіштер шығаратын зауыт таныстырылды. Жиынға қатысушылар бұл жобаларды жер учаскелерімен және инфрақұрылыммен қамтамасыз ету мәселелерін талқылады, оның қорытындысы бойынша жауапты тұлғаларға нақты тапсырмалар берілді.
Атап өтейік, 2025 жылдың қорытындысы бойынша облыс экономикасына 1,7 трлн теңге инвестиция тартылып, өсім 121,6%-ды құрады. Жалпы құны 340 млрд теңге болатын 58 жоба іске қосылып, бұл 8 мыңнан астам жұмыс орнын құруға мүмкіндік берді. Биыл билік қарқынды сақтап, 369 млрд теңге сомасына 67 жобаны іске асыру есебінен қайтадан 1,7 трлн теңге тартуды көздеп отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
