Ақтөбе облысы әкімдігіндегі өрттен кейін мемлекеттік қызметтер онлайн форматқа көшті

Ақтөбе облысының әкімі Асхат Шахаров төтенше жағдайлар бойынша жедел штабтың шұғыл отырысын өткізді. Жиында облыс әкімдігі ғимаратының шатырындағы өртке байланысты жағдай қаралды, деп хабарлайды Kapital.kz іскерлік ақпарат орталығы.

Өңір басшысының сөзінше, кеше облыстық әкімдік ғимаратында болған өрт толық сөндіріліп, жағдай бақылауға алынған.

«Ең бастысы - зардап шеккендер жоқ, медициналық көмекке ешкім де жүгінбеді. Қазіргі уақытта арнайы комиссия өрттің себептерін анықтауда. Бұл мәселе менің жеке бақылауымда, жедел штаб жұмысы жалғасып жатыр. Қазіргі уақытта арнайы комиссия өрттің себептерін анықтап жатыр», деді ол.

Облыс әкімі нақты іс-қимыл жоспары бекітіліп, барлық жұмыс кезең-кезеңімен жүргізіліп жатқанын атап өтті.

«Ғимараттың техникалық жағдайын толық бағалау үшін сарапшылар тартылды. Айтып өтейін ғимараттың тек шатыры ғана жанды. Алтыншы қабаттағы кабинеттерге келген зақым айтарлықтай емес. Біз соңғы рет әкімдікке 2022 жылы жөндеу жүргіздік, оның ішінде тек жұмыс кабинеттері жаңаланды», деп қосты ол.

Оның айтуынша, бүгін түстен кейін әкімдік қызметкерлерінің басым бөлігі өз жұмыс орындарына оралады. Оған дейін мемлекеттік қызметтер онлайн, үздіксіз көрсетіледі.

Сонымен қатар өрттің себептерін анықтау бойынша арнайы комиссия жұмыс құрылып, аталған іс бойынша тергеу амалдары жүргізіліп жатыр.

Бұған қоса ғимаратты қалпына келтіру жұмыстарының нақты жоспары әзірленіп жатыр. Асхат Шахаров бұл жоспардың әр кезеңнің орындалуы жеке бақылауында болатынын атап өтті.