Кабулда тұңғыш Қазақстан-Ауғанстан ғылыми орталығы ашылады
Қазақстандық ғалымдар су қауіпсіздігі және ауыл шаруашылығы салалары бойынша мамандар даярлайды
Кабулда су ресурстарын басқару саласындағы алғашқы Қазақстан-Ауғанстан білім беру және ғылыми-зерттеу орталығы құрылады. Серіктестік орнату туралы ниет келісіміне Қазақ ұлттық су шаруашылығы және ирригация университеті, Қазақ ұлттық аграрлық зерттеу университеті және Кабул университеті қол қойды, деп хабарлайды primeminister.kz.
Орталықты Кабул университетінің базасында ашу жоспарланған. Бұл бастама мамандар даярлауға, тәжірибе алмасуға, бірлескен зерттеулер жүргізуге және су-аграрлық секторға заманауи шешімдерді енгізуге мүмкіндік береді. Білім беру бағдарламалары мен ғылыми қолдауды қазақстандық ғалымдар мен сарапшылар қамтамасыз етпек.
Жаңа құрылым су қауіпсіздігі, тұрақты ауыл шаруашылығы, климатқа бейімделу, экологиялық мониторинг және азық-түлік қауіпсіздігі секілді бағыттарды біріктіретін университеттаралық зерттеу платформасына айналады деп күтілуде. Мұндай кешенді тәсіл аймақтың тұрақты дамуы үшін тиімді әрі практикалық шешімдер әзірлеуге септігін тигізеді.
Бұған дейін Қазақстан ІІМ ауғандық кинологтарды оқытуды ұйымдастыруға дайын екенін мәлімдеген болатын. Сонымен қатар қазақстандық мамандардың Мазари-Шарифтегі азот өндіретін зауытты жаңғыртуға қатысу мәселесі де талқыланды. Қазақстан Мазари-Шарифте ауғандық Gazanfar корпорациясымен бірлескен серіктестік кеңсесін ашады. Тұтастай алғанда, тараптар өзара тауар айналымын 3 миллиард долларға жеткізуге уағдаласты.
Сондай-ақ Президент Қазақстанда БҰҰ-ның өңірлік орталығын құру туралы заңға қол қойды. Жаңа құрылым Орталық Азия елдері мен Ауғанстандағы тұрақты даму мақсаттарына қол жеткізуге ықпал етпек.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
