Қазақстандық жүргізуші куәліктері БАӘ-де жарамды болады
Қазақстан мен Біріккен Араб Әмірліктері жүргізуші куәліктерін өзара тану және айырбастау туралы меморандумға қол қойды
Қазақстан мен Біріккен Араб Әмірліктері жүргізуші куәліктерін өзара тану және айырбастау туралы меморандумға қол қойды, деп хабарлайды Polisia.kz.
25 маусымда Қазақстан Республикасының Ішкі істер министрі араб тарапының шақыруымен Біріккен Араб Әмірліктерінің астанасы Әбу-Дабиге барды. Сапар аясында Ержан Сәденов БАӘ премьер-министрінің орынбасары – ішкі істер министрі шейх Саиф бен Заид Әл Нахаянмен келіссөз жүргізді.
Тараптар қылмысқа, оның ішінде ұйымдасқан трансұлттық қылмысқа, киберқылмысқа және есірткінің заңсыз айналымына қарсы іс-қимыл саласындағы екіжақты ынтымақтастықты дамыту перспективаларын, сондай-ақ қылмыскерлерді іздестіру, жедел ақпарат алмасу, заманауи технологияларды енгізу және кадр даярлау мәселелерін талқылады.
Келіссөздердің басты нәтижесі Қазақстан Республикасы Ішкі істер министрлігі мен Біріккен Араб Әмірліктері Ішкі істер министрлігі арасында жүргізуші куәліктерін өзара тану және айырбастау туралы меморандумға қол қою болды. Құжат әкімшілік рәсімдерді жеңілдетуге және екі ел азаматтары үшін қосымша қолайлы жағдай жасауға бағытталған.
Жыл сайын Біріккен Араб Әмірліктеріне шамамен 400 мың Қазақстан азаматы барады. Бұдан бөлек, бұл елде 14 мыңға жуық қазақстандық тұрақты тұрады. Қол қойылған меморандум олардың жүргізуші куәліктерін пайдалану және айырбастау рәсімін жеңілдетуге мүмкіндік береді.
Меморандум ұлттық жүргізуші куәліктерін өзара тануды, сондай-ақ құжатта көзделген жағдайларда оларды жеңілдетілген тәртіппен айырбастауды қарастырады. Құжат тараптар қажетті ішкі мемлекеттік рәсімдерді аяқтағаннан кейін күшіне енеді.
Сапар барысында қазақстандық делегация БАӘ-нің Дағдарыстық жағдайлар жөніндегі ұлттық агенттігінің жұмысымен танысты. Сонымен қатар Ішкі істер министрі Ержан Сәденов EDGE Group технологиялық конгломератының басшылығымен кездесу өткізді. Онда жасанды интеллект, киберқауіпсіздік, арнайы техника мен қару-жарақ саласындағы озық әзірлемелер, сондай-ақ құқық қорғау қызметіне арналған заманауи технологиялық шешімдер таныстырылды.
ІІМ мәліметінше, қол жеткізілген келісімдер Қазақстан мен Біріккен Араб Әмірліктері арасындағы ынтымақтастықты одан әрі нығайтуға және өзара қызығушылық тудыратын көптеген бағыт бойынша практикалық өзара іс-қимылды кеңейтуге ықпал етеді.
Еске салайық, бұған дейін Қазақстанда жүргізуші куәлігін, көлік құралының техникалық паспортын немесе мемлекеттік тіркеу нөмірін мамандандырылған ХҚКО-дан жеткізу арқылы алу қызметі іске қосылғаны хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
