Қазақстанда әлеуметтік кәсіпкерлер саны бір жылда екі есеге жуық артты

Қазақстанда әлеуметтік кәсіпкерлікпен айналысатын субъектілер қатары соңғы бір жылда айтарлықтай өсті. 2025 жылғы 31 желтоқсандағы жағдай бойынша Әлеуметтік кәсіпкерлік субъектілерінің тізіліміне 1431 кәсіпорын енгізілді. Ал 2024 жылдың қорытындысында бұл көрсеткіш 835 болған. Бұл туралы Ұлттық экономика министрлігінің баспасөз қызметі хабарлады.

Тізілім деректеріне сәйкес, әлеуметтік кәсіпкерлердің ең көп бөлігі Астана мен Алматы қалаларында шоғырланған. Сондай-ақ Батыс Қазақстан, Алматы облыстары мен Абай облысында да бұл бағыттағы кәсіпкерлік белсенді дамып келеді.

Қызмет түрлері бойынша әлеуметтік кәсіпкерлердің шамамен 60 пайызы білім беру саласында жұмыс істейді. Тағы 20 пайызы әлеуметтік қызмет көрсету бағытында еңбек етеді. Ал 10 пайызы денсаулық сақтау саласында қызмет атқарса, қалған 10 пайызы өзге бағыттарда жұмыс істейді.

Әлеуметтік кәсіпкерлік субъектілерінің тізілімі облыстардың, республикалық маңызы бар қалалардың және басқаланың жергілікті атқарушы органдары ұсынған мәліметтер негізінде қалыптастырылады. Алдын ала өтінімдерді арнайы комиссия қарайды.

Комиссияның негізгі міндеті – әлеуметтік кәсіпкерлік саласында қызмет жүргізетін жеке кәсіпкерлер мен заңды тұлғаларды (ірі кәсіпкерлік субъектілерін қоспағанда) тізілімге енгізу жөнінде ұсыныстар әзірлеу.

Қолданыстағы заңнамаға сәйкес, бұл тізілім жыл сайын 1 наурызға дейін, алдыңғы күнтізбелік жылдың 31 желтоқсанындағы жағдай бойынша бекітіледі.

Ұлттық экономика министрлігі Қазақстанда әлеуметтік кәсіпкерліктің заңнамалық негізі 2021 жылы қалыптасқанын еске салды. Сол кезде нормативтік деңгейде «әлеуметтік кәсіпкерлік» ұғымы бекітіліп, ол азаматтар мен қоғамның әлеуметтік мәселелерін шешуге бағытталған кәсіпкерлік қызмет ретінде айқындалды.

Сонымен қатар әлеуметтік кәсіпкерлікке мүмкіндігі шектеулі жандар құрған кәсіпорындар, ерекше қажеттіліктері бар адамдар мен әлеуметтік тұрғыдан осал топ өкілдерін жұмыспен қамтитын бизнес түрлері де жатады.