Shell Ақтөбе облысында мұнай-газ барлауын жүргізеді
«Жаңатұрмыс» учаскесіндегі геологиялық барлау жобасының мерзімі 2032 жылға дейін белгіленді
Қазақстан Республикасы Энергетика министрлігі мен Shell компаниясының қазақстандық бөлімшесі Ақтөбе облысындағы «Жаңатұрмыс» учаскесінде геологиялық барлау жұмыстарын жүргізу жөніндегі келісімшартқа қол қойды, деп хабарлайды Kapital.kz іскерлік ақпарат орталығы.
Құжатқа ҚР Энергетика вице-министрі Ерлан Ақбаров пен «Shell» концернінің Қазақстандағы аға вице-президенті әрі төрайымы Сюзанн Куган қол қойған.
Келісімге сәйкес компания белгіленген аумақта сейсмикалық барлау жұмыстарын жүргізіп, геологиялық деректер жинап, техникалық бағалау жасайды. Барлық жұмыстар қолданыстағы заңнама талаптарына сәйкес және тиісті рұқсаттар алынғаннан кейін жүзеге асырылады.
Аумағы 1 377 шаршы шақырымды құрайтын «Жаңатұрмыс» учаскесі елдегі перспективалы мұнай-газ бассейндерінің бірінде орналасқан. Жоба аясында 3D сейсмикалық зерттеулер жүргізіліп, терең барлау ұңғымасын бұрғылау мүмкіндігі қарастырылған.
Жобаның ауқымы мен техникалық күрделілігін ескере отырып, келісімшарттың мерзімі 2032 жылға дейін белгіленді. Құжат жетілдірілген үлгілік келісімшарт талаптары негізінде іске асырылады.
Келісім аясында «Shell» компаниясы учаске орналасқан өңірдің әлеуметтік-экономикалық дамуына кемінде 100 млн теңге бөледі. Қазіргі уақытта Қазақстанда көмірсутектерді барлау және өндіру бойынша қолданыста 321 келісімшарт бар.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
