Алматы облысындағы стоматологияда ортодонттың 4,5 мыңнан астам жалған қабылдауы анықталды

Алматы облысындағы стоматологиялық клиника Тегін медициналық көмектің кепілдендірілген көлемі аясында көрсетілген ортодонттың жалған қабылдауларын тіркеген. Бұл туралы Kapital.kz іскерлік ақпарат орталығы қаржылық мониторинг агенттігінің баспасөз қызметіне сілтеме жасап хабарлады.

«Алматы облысы бойынша ҚМА департаменті тегін медициналық көмектің кепілдендірілген көлемі аясында стоматологиялық қызмет көрсету кезінде жасалған алаяқтық фактісі бойынша тергеуді аяқтады. Жеке стоматологиялық клиникалардың директоры «Әлеуметтік медициналық сақтандыру қоры» КЕАҚ-пен жалпы сомасы 450 млн теңгеден астам медициналық қызметтерді сатып алу туралы келісімшарттар жасаған. Келісімшарт шарттарына сәйкес, клиникалар міндетті әлеуметтік медициналық сақтандыру жүйесі аясында азаматтарға шұғыл және жоспарлы стоматологиялық көмек көрсету міндетін алған», – делінген ақпаратта.

Алайда күдікті «Дамумед» медициналық ақпараттық жүйесіне ортодонтиялық көмек көрсетілді деген жалған мәліметтер енгізуді ұйымдастырған. Нақтысында аталған медициналық қызметтер пациенттерге көрсетілмеген, деп түсіндіреді агенттік.

«Заңсыз әрекеттерді заңды етіп көрсету үшін күдікті дәрігерлердің есептік жазбаларын, сондай-ақ бұрын клиникаларға көмекке жүгінген кәмелетке толмаған пациенттердің анкеталық деректерін өз бетінше пайдаланған. Нәтижесінде ортодонтиялық көмек көрсетілгені туралы расталмаған 4 597 жағдай анықталды. Келтірілген залал сомасы 66 млн теңгені құрады», – деп хабарлады ведомство.

Сот санкциясымен банктегі 23 млн теңге көлеміндегі шоттарға, сондай-ақ құны 29 млн теңге болатын стоматологиялық жабдыққа тыйым салынды. Тергеу барысында күдікті 11 млн теңге көлеміндегі шығынды өтеген. Оған қатысты бұлтартпау шарасы ретінде үйқамақ таңдалды. Қазақстан Республикасы ҚПК-нің 201-бабына сәйкес өзге ақпарат жария етуге жатпайды.

Айта кетейік, 2026 жылғы 20 қаңтарда өткен құрылтайда президент Әлеуметтік медициналық сақтандыру қорына жүргізілген кешенді тексеру көптеген заңбұзушылықтар мен теріс пайдалануларды анықтағанын атап өтті. Құқық қорғау органдарына «сыбайлас жемқорлық схемаларынан пайда көргендердің барлығын анықтау» тапсырылды.

Еске салайық, ӘМСҚ қызметін талдау барысында тіркеулерді қолдан жасау, жалған пациенттер және қайтыс болған адамдарға қызметтер көрсету секілді бұзушылықтарды анықтады. Премьер-министр Олжас Бектенов ӘМСҚ-ны Қаржы министрлігінің бағынысына беруді тапсырды. Бұған дейін МӘМС саласында 26 млрд теңгеге қаржылық бұзушылықтар анықталғаны хабарланған еді.