«Даму» қоры жанынан бизнеске арналған реабилитациялық орталықтар ашылады
Шалғайдағы кәсіпкерлерді қолдау үшін ауылдарға мобильді фронт-офистер барады
Қазақстанда шағын және орта бизнесті (ШОБ) қолдаудың нарықтық тетіктері күшейтіліп, мемлекеттік көмек көрсету географиясы кеңейтілуде. Бұл туралы бүгін ULTTYQ ÓNIM отандық өндірушілерлің IX көрмесінде Премьер-Министрдің орынбасары – Ұлттық экономика министрі Серік Жұманғарин мәлімдеді, деп хабарлайды Kapital.kz іскерлік ақпарат орталығының тілшісі.
Оның сөзінше, вице-премьердің айтуынша, бүгінде мемлекеттік қолдау шараларының қолжетімділігін арттыру мақсатында қаржыландыру құралдары мен кепілдік беру тетіктері айтарлықтай кеңейтілді. Басты назар шағын қалалар мен ауылдық жерлердегі микро және шағын бизнесті дамытуға бағытталып отыр. Осы мақсатта арнайы «Іскер аймақ» кешенді қолдау бағдарламасы іске қосылды.
«Бизнесті қолдау бағдарламаларының тиімділігін арттыру үшін «Даму» қорының өңірлік филиалдары базасында «Бәйтерек» холдингінің барлық бағыттарын қамтитын бірыңғай фронт-офистер құрылды. Ал шалғай аудандардағы кәсіпкерлер үшін арнайы мобильді фронт-офистер іске қосылып жатыр. Бұл мемлекеттік қолдауды бизнеске барынша жақын, қолжетімді әрі ыңғайлы етеді», — деп атап өтті Серік Жұманғарин.
Сонымен қатар, Үкімет тек жаңа жобаларды қаржыландырып қана қоймай, нарықта қиындыққа тап болған кәсіпкерлерді де назардан тыс қалдырмайтынын атап өтті. Мемлекет тарапынан бизнесті дамудың барлық кезеңінде сүйемелдеудің жаңа институционалдық жүйесі енгізілуде.
«Бизнесті қолдаудың тағы бір маңызды бағыты — оларды дамудың барлық кезеңінде сүйемелдеу. Осыған байланысты «Даму» қорының жанынан арнайы «реабилитациялық орталықтар» құрылуда. Қаржылық немесе басқа да қиындықтарға тап болған кәсіпкерлер бұл орталықтарда кешенді қолдауға ие болады. Оның ішіне қаржылық және қаржылық емес шаралар, сондай-ақ бизнестің тұрақтылығын қайта қалпына келтіру бойынша кеңес беру мен тікелей сүйемелдеу жұмыстары кіреді», — деп қосты вице-премьер.
Серік Жұманғарин 2025 жылы Үкімет «Даму» қоры желісі бойынша бизнесті ынталандыруға 560 млрд теңгеден астам қаражат бағыттағанын айтты. Бұл инвестиция жалпы несие қоржыны 2,2 трлн теңгені құрайтын ШОБ-тың 13 мың жобасын қамтуға мүмкіндік берді.
«Бұл құрғақ статистика емес. Бұл қолдаудың арқасында 15 мыңға жуық жаңа жұмыс орны ашылып, өнім өндірісі 27,7 трлн теңгеге артты. Сондай-ақ қазынаға 2 трлн теңгеге жуық салық түсті. Бұл — экономикаға, өңірлерге және азаматтарымызға салынған тікелей инвестиция», — деді ол.
Айта кетейік, Астанада бүгін «ULTTYQ ÓNIM» отандық өндіруішілердің көрмесі басталды. Ұйымдастырушылар көрмеге көрмеге 600-ден астам отандық компания қатысып жатқанын хабарлады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
