Кәсіпкер Владимир Ким АХҚО алаңында жаңа актив тіркеді
RBK Holding Limited бірнеше компанияны бақылау және басқарумен айналысады
Кәсіпкер Владимир Ким Астана халықаралық қаржы орталығы алаңында RBK Holding Limited компаниясын тіркеді, деп хабарлайды Kapital.kz іскерлік ақпарат орталығының тілшісі Astana Financial Services Authority деректеріне сілтеме жасап.
Компания АХҚО-да 2026 жылғы 21 мамырда тіркелген. Қызмет бағыты ретінде бірнеше компанияны бақылау және басқару көрсетілген. CEO қызметіне Болатбек Жайназаров тағайындалған. Ол 2017 жылғы қазан айынан бері Bank RBK директорлар кеңесінің мүшесі болып келеді.
Владимир Ким әртүрлі салада бірнеше бизнеске иелік етеді.
Оның ең ірі активтерінің бірі – KAZ Minerals. Компанияның жалғыз құрылтайшысы – Нидерландта тіркелген Nova Resources B.V. Оның түпкілікті бенефициарлары – Владимир Ким мен кәсіпкер Олег Новачук.
Топтың портфелінде бірнеше актив бар: Ақтоғай мыс кеніші, Бозшакөл кеніші және Бозымшақ кәсіпорны.
Сонымен қатар KAZ Minerals Абай және Шығыс Қазақстан облыстарындағы Артемьев, Орлов және Ертіс жерасты кеніштерін игеріп жатыр.
Владимир Ким сонымен бірге «KСС Финанс» ЖШС арқылы Bank RBK-тің мажоритарлық акционері саналады. KASE дерегіне сәйкес, 2026 жылғы 1 сәуірдегі жағдай бойынша компания банк акцияларының 84,81%-ына иелік етеді.
AFSA мәліметінше, кәсіпкер Олег Новачукпен бірге 2022 жылғы маусымда АХҚО алаңында тіркелген Trianon Limited компаниясына иелік етеді. Компания холдингтік қызметпен айналысады.
Бизнесменнің тағы бір ортақ активі – «Наурыз корпорациясы» ЖШС. e-Gov мәліметі бойынша, компания жеке немесе жалға алынған жылжымайтын мүлікті жалға беру және пайдалану, сондай-ақ техника мен жабдықтарды жалға беру қызметімен айналысады.
e-Gov деректеріне сәйкес, Владимир Ким кәсіпкер Эдуард Огаймен бірге Kazakhmys Holding Limited жеке компаниясына да иелік етеді. Ол 2021 жылғы тамызда АХҚО-да тіркелген және холдингтік қызметпен айналысады.
2025 жылғы желтоқсанда Владимир Ким мен оның серіктесі Эдуард Огай мыс активі – «Корпорация Казахмыс» ЖШС-ін сату жөніндегі негіздемелік келісімге қол қойылғанын жариялаған болатын. Сатып алушы ретінде Qazaq Story иесі Нұрлан Артықбаев аталды. Мәміле сомасы ресми түрде жарияланған жоқ.
2026 жылғы наурызда «Казақмыс корпорациясы» компаниясы қатысушылар құрамының өзгеруіне байланысты топ активтерінің бір бөлігін қайта ұйымдастыру мәмілесінің аяқталғанын хабарлады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
