Қазақстан әуе компаниялары Үндістан бағытында жаңа рейстер ашуды жоспарлап отыр
Сондай-ақ қолданыстағы бағыттар бойынша рейстер санын арттыру мүмкіндігі қарастырылуда
Қазақстанның әуе компаниялары Үндістан бағыты бойынша жаңа әуе бағыттарын іске қосуды жоспарлап отыр. Бұл туралы ҚР Көлік министрлігі Азаматтық авиация комитетінің төрағасы Салтанат Томпиева мен Үндістанның Халықаралық азаматтық авиация ұйымындағы (ИКАО) тұрақты өкілі Ангшумали Растогимен өткен кездесуде белгілі болды, деп хабарлайды Kapital.kz іскерлік ақпарат орталығы Азаматтық авиация комитетінің баспасөз қызметіне сілтеме жасап.
Ведомство дерегінше, тараптар азаматтық авиация саласындағы екіжақты ынтымақтастықтың қазіргі жағдайы мен даму перспективаларын талқылап, Қазақстан мен Үндістан арасындағы әуе қатынасын кеңейту мәселесіне ерекше назар аударды.
Салтанат Томпиева Қазақстан мен Үндістан арасындағы қолданыстағы келісімдік-құқықтық база әуе қатынасын дамытуға берік негіз қалыптастыратынын атап өтті.
Қазіргі уақытта екі ел арасында Air Astana әуе компаниясы рейстер орындайды: Алматы – Дели: аптасына 13 рейс; Алматы – Мумбай: аптасына 3 рейс.
Сонымен қатар, Азаматтық авиация комитеті қазақстандық әуе компаниялары Үндістан бағыты бойынша жаңа маршруттар ашуға, сондай-ақ қолданыстағы бағыттар бойынша рейстер санын арттыруға ниетті екенін хабарлады.
«Қазақстандық әуе компаниялары ұшу географиясын кеңейтуге дайын, оның ішінде жаңа бағыттарды ашу және қолданыстағы рейстер жиілігін арттыру жоспарланып отыр. Әуе қатынасының кеңеюі екі ел арасындағы сауда-экономикалық және туристік ынтымақтастыққа қосымша серпін береді деп сенеміз», – деді ҚР КМ Азаматтық авиация комитетінің төрағасы.
Келіссөздер қорытындысы бойынша тараптар ынтымақтастықты одан әрі нығайтуға және Қазақстан мен Үндістан арасындағы тұрақты көлік байланыстарын дамытуға мүдделі екенін растады.
Анықтама ретінде: Қазақстан мен Үндістан үкіметтері арасындағы әуе қатынасы туралы келісім 1993 жылғы 10 қыркүйекте қол қойылып, 1998 жылғы 10 желтоқсанда ратификацияланған. 2015 жылғы 19 қазандағы өзара түсіністік туралы меморандумға сәйкес, әр тараптың тағайындалған тасымалдаушылары аптасына 21 рейске дейін орындай алады.
Еске салсақ, бұған дейін FlyArystan Ақтаудан Батумиге тікелей рейс ашатыны хабарланған. Сондай-ақ армян әуе компаниясы «Астана – Ереван – Астана» бағытын іске қосуды жоспарлап отыр. Uzbekistan Airways «Ташкент – Атырау» рейсін ашуды көздейді. Centrum Air «Ташкент – Астана – Ташкент» бағытын іске қосқан болатын. Ал VietJet Air «Ханой – Алматы – Прага» әуе маршрутын құруды жоспарлап отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
