«Ордабасы» футбол клубын инвесторға беру әлі аяқталған жоқ

Қазіргі уақытта «Ордабасы» кәсіби футбол клубы» АҚ-ның 100% акциясын жеке инвесторға беру жүзеге асқан жоқ. Бұл туралы Шымкент қаласының дене шынықтыру және спорт басқармасы ресми сұрау хатқа берген жауабында хабарлады, деп жазды Kapital.kz іскерлік ақпарат орталығының тілшісі.

Бұған дейін хабарланғандай, Шымкент қаласының әкімі Ғабит Сыздықбеков және «Integra Construction KZ» ЖШС басшылығы «Ордабасы» футбол клубын жекешелендіру бойынша меморандумға қол қойған болатын. Integra Construction KZ компаниясының бенефициарлық иесі – кәсіпкер Шахмұрат Мүтәліп.

Басқарманың мәліметінше, 2026 жылғы 16 ақпанда Шымкент қаласы әкімдігі мен әлеуетті инвестор арасында ниет меморандумы жасалған. Құжат рамалық және декларативтік сипатта болғандықтан, мәміленің аяқталғанын білдірмейді. Басқарма атап көрсеткендей, «мәміле тек Қазақстан Республикасының заңнамасына сәйкес жекешелендіру рәсімі аясында жүзеге асырылуы мүмкін».

«Қазіргі уақытта клубтың 100% акциясы Шымкент қаласы Қаржы басқармасы атынан мемлекетке тиесілі. Жекешелендіру рәсімі сәтті аяқталған жағдайда қатысу құрылымы сауда нәтижелерімен анықталады. Барлық рәсімдер аяқталғанға дейін клуб мемлекеттік меншікте қалады», – делінген хабарламада.

Басқарманың жауабына сәйкес, меморандум инвестордың мынадай ниеттерін қарастырады:

- клубтың қаржылық тұрақтылығын қамтамасыз ету;

- корпоративтік басқарудың заманауи стандарттарын енгізу;

- инфрақұрылымды жаңғырту;

- балалар мен жасөспірімдер футбол академиясын құру.

Алайда нақты инвестициялық параметрлер мен міндеттемелер көлемі тек жекешелендіру рәсімі аяқталғаннан және сәйкес келісімшарттар жасалғаннан кейін анықталады.

Басқарма атап өткендей, клубқа қаржылық қамтамасыз ету жекешелендіру аяқталғанға дейін 2025 жылғы 22 шілдедегі №143 министр бұйрығымен бекітілген лимиттер аясында жүзеге асырылады.

Еске салсақ, 2025 жылғы қыркүйекте Президент туризм және спорт министріне футбол клубтарын жедел жекешелендіру жөнінде тапсырма берген болатын. Қазан айында Премьер-министр Олжас Бектенов футбол клубтарын коммерцияландыру бойынша әлеуетті инвесторлармен жұмыс жүргізіліп жатқанын хабарлаған.

Бұдан кейін қазақстандық «Астана» футбол клубына инвестор табылғаны белгілі болды, оның кім екені 2026 жылы жарияланбақ. «Шахтер» футбол клубын Тимур Турлов сатып алса, ал Астана қалалық «Жеңіс» клубынаның иесі Михаил Ломтадзе болды. Петропавл қаласындағы «Қызылжар» футбол клубының инвесторы – кәсіпкер Сергей Кан. Қызылорда қалалық «Қайсар» футбол клубы TAU Group LTD компаниясының басшысы Исламғали Қозбақовқа жеке басқаруға берілді. «Оқжетпес» футбол клубы жаңа қаржыландыру моделіне көшеді, бұл үшін қоғамдық қор құрылып, оның құрылтайшысы Иван Сауэр болмақ. «Елімай» футбол клубының негізгі серіктесі – KAZ Minerals. Ал «Тұран» футбол клубы жеке инвесторларды тартқан жоқ.