АҚШ Жоғарғы сотының шешімінен кейін Bayer акциялары 17%-ға қымбаттады
Сот Roundup гербицидіне қатысты іс бойынша өтемақы төлеу туралы шешімнің күшін жойды
АҚШ Жоғарғы соты Bayer AG германдық химиялық компаниясының Roundup гербицидіне қатысты көпжылдық сот дауларындағы ұстанымын қолдады. Осы шешімнен кейін компания акцияларының бағасы күрт өсті, деп жазады Интерфакс-Қазақстан.
АҚШ-тың жоғары сот инстанциясы Миссури штатынан талапкерге 1,25 млн доллар көлемінде өтемақы төлеу туралы алқабилер шешімінің күшін жойды.
Талапкер Roundup гербицидін қолданғаннан кейін өзінде Ходжкин емес лимфома анықталғанын айтып, өндірушіні өнім қаптамасында қатерлі ісік қаупі туралы ескерту болмағаны үшін айыптаған.
Жоғарғы сот жеті судьяның екі судьяға қарсы дауыс беруімен компания федералдық заңнамаға сәйкес қатерлі ісік қаупі туралы ескерту орналастыруға міндетті болмаған деген шешім қабылдады. Федералдық заң бұл жағдайда штат заңдарынан басым күшке ие.
Roundup гербицидін бастапқыда Monsanto компаниясы шығарған. Bayer оны 2018 жылы 63 млрд долларға сатып алған.
Bloomberg агенттігінің мәліметінше, Жоғарғы соттың бұл шешімі Bayer-ді саны 67 мыңға жететін осыған ұқсас талап-арыздардан қорғауға мүмкіндік береді. Компания осы уақытқа дейін өтемақы ретінде миллиардтаған доллар төлегенімен, гербицидтің адам денсаулығына қауіпсіз екенін айтып келеді.
Бейсенбі күнгі сауда-саттық барысында Bayer акцияларының бағасы 17%-ға көтерілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
