Сән-салтанат тауарларының әлем бойынша саудасы 2026 жылы 2-4%-ға өседі
АҚШ пен Қытайдағы тұрақты сұраныс люкс сегментінің қалпына келуіне қолдау көрсетіп отыр
Таяу Шығыстағы қақтығысқа қарамастан, екінші тоқсанда сән-салтанат тауарлары нарығында қайта жандана бастағаны байқалды. Соның нәтижесінде 2026 жылдың қорытындысы бойынша бұл сегменттегі әлемдік сатылым 2-4%-ға өсуі мүмкін. Мұндай болжамды Bain & Co консалтингтік компаниясының сарапшылары жасап отыр, деп жазады Интерфакс-Қазақстан.
Компанияның Таяу Шығыстағы әскери іс-қимылдар басталғанға дейін жарияланған алдыңғы болжамында биылғы сатылымның 3-5%-ға өсетіні айтылған болатын.
«Макроэкономикалық және әлеуметтік-саяси деңгейдегі белгісіздік күшейіп келе жатқанын байқап отырмыз, дегенмен сұраныс сақталып отыр», – деді Bain & Co серіктесі Франческа Левато Reuters агенттігіне берген сұхбатында. Оның айтуынша, «АҚШ-та сұраныс қарқынды өсіп жатыр, ал Қытайда қалпына келу күткеннен жылдам жүріп жатыр».
Аталған өсім Еуропада туристер ағынының азаюына және Таяу Шығыстағы сұраныстың әлсіреуіне байланысты төмендеп кеткен сатылым көлемін өтеп отыр.
Жеке тұтынуға арналған сән-салтанат тауарлары нарығының көлемі 2025 жылы 358 млрд еуроға (406 млрд доллар) бағаланған. Өткен жылы бұл нарық 2%-ға қысқарғанымен, валюта бағамдарының өзгерісін есепке алмағанда 1%-ға өскен.
Франческа Леватоның айтуынша, люкс индустриясы 2022 жылдан бері шамамен 70 млн тұтынушысынан айырылған. Бұған өндірушілердің бағаны көтеріп, ең ауқатты клиенттердің сұранысына басымдық беруі себеп болған.
«Сала ең бай 1% тұтынушыға ғана назар аудармай, тұтынушылар базасын кеңейтуге ынталандыруы қажет», – деп есептейді ол.
Bain & Co зерттеуі жасанды интеллект технологияларының кеңінен таралуы тұтынушылардың люкс брендтерін бағалау тәсілін өзгертіп жатқанын да көрсетті. Сән-салтанат тауарларын сатып алушылардың шамамен жартысы тауарларды іздеу және салыстыру үшін жасанды интеллектіні пайдаланады.
Тағы бір байқалған үрдіс – қайталама нарыққа қызығушылықтың артуы. Тұтынушылардың жартысы жаңа тауар сатып алмас бұрын алдымен екінші нарықтағы ұсыныстарды қарайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
