BMW Қытайдағы сұраныстың төмендеуіне байланысты жылдық болжамын төмендетті
Автоөндіруші Таяу Шығыстағы қақтығыстың теріс салдарынан қауіптенеді
Германияның BMW AG автоконцерні Қытайдағы сұраныстың бәсеңдеуін, сондай-ақ Таяу Шығыстағы қақтығыстың күтілгеннен де ауыр тиетінін алға тартып, 2026 жылға арналған болжамдарын айтарлықтай төмендетті, деп хабарлады «Интерфакс-Қазақстан».
Компанияның жаңа болжамына сәйкес, биыл көлік жеткізілімі өткен жылмен салыстырғанда «сәл төмен» болады. Ал бұған дейін жеткізілім көрсеткіші өткен жылғы деңгейде қалады деп болжанған еді.
Автомобиль сегментіндегі EBIT маржасының болжамы бұған дейін жоспарланған 4-6%-дан 1-3%-ға дейін, ал капитал рентабельділігі (RoCE) 6-10%-дан 1-5%-ға дейін азайды. Сонымен қатар, BMW бұған дейін салық төлегеннен кейінгі жылдық пайда «қалыпты деңгейде» азаяды деп есептесе, енді оның «айтарлықтай» құлдырайтынын мәлімдеп отыр
Компания таратқан мәлімдемеде Қытайдың автомобиль нарығындағы жағдай екінші тоқсанда тіпті нашарлап кеткені атап өтілген. BMW-ның Еуропа мен АҚШ-тағы саудасының өсуі Қытай мен жалпы Азия-Тынық мұхиты аймағындағы сұраныстың құлдырауын өтей алмай жатыр.
Сонымен бірге, Таяу Шығыстағы қақтығыс энергия тасымалдаушылардың қымбаттауына түрткі болып, бұл автоөндірушінің шығындарын арттыруда. Бұған қоса, қақтығыстан туындаған тұрақсыздық бүкіл әлемдегі тұтынушылардың белсенділігіне де жағысыз әсер етіп жатқаны хабарламада айтылған.
BMW алдағы жылдары нәтиже беретін қосымша шаралар арқылы шығындарды азайту бағдарламасын жеделдетуді жоспарлап отыр. Бұл шаралар компаниядан біржолғы есептен шығаруды талап етеді, ал бұл көрсеткіштер оның 2026 жылдың екінші жартыжылдығындағы есептілігінде көрініс табады.
Автоөндіруші биыл автомобиль сегментіндегі еркін ақша ағыны 2,5 миллиард еуродан асады деп үміттенеді. Компания бұрынғыша таза пайданың 30-40%-ын дивиденд төлеуге бағыттауды, сондай-ақ акцияларды қайта сатып алуды жоспарлап отыр.
Сейсенбідегі сауда қорытындысы бойынша BMW акциялары 0,6%-ға арзандады. Жаңартылған болжам Франкфурттегі биржа жабылғаннан кейін жарияланды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
