Ақмола облысында тәулігіне 1 млн жұмыртқа өндіретін ірі кәсіпорын салынады
«Kaz Eggs» жаңа инвестициялық жобасы Целиноград ауданында жүзеге асырылады
Ақмола облысында тауық жұмыртқасын терең өңдеуге арналған ірі инвестициялық жоба жүзеге асырылуда. «Kaz Eggs» серіктестігі бастамасымен жүзеге асырлатын өндірістік кешен тәулігіне 1 миллион жұмыртқа шығаруды жоспарлап отыр, деп хабарлайды Kapital.kz іскерлік ақпарат орталығы Ауыл шаруашылығы министрлігіне сілтеме жасап.
Кәсіпорын Ақмола облысы Целиноград ауданының Ақмол ауылында орналасады. Жалпы инвестиция көлемі 30 млрд теңгені құрайды. Жаңа кәсіпорын 2027 жылдың соңына қарай іске қосылады деп жоспарланып отыр, жоба аясында 80 жаңа жұмыс орны ашылмақ.
«Бұл жоба отандық өңдеу өнеркәсібін дамытудағы маңызды қадам және қосылған құны жоғары өнім өндірісін арттыруға жол ашады. Қазақстанның агроөнеркәсіптік кешеніндегі басым бағыттардың бірі ауыл шаруашылығы шикізатын өңдеу бағытын тұрақты дамыту», деп атап өтті министрлікте.
Осы ретте министрлік заманауи өндірістерді құруға, отандық өнімнің бәсекеге қабілеттілігін арттыруға және елдің азық-түлік қауіпсіздігін нығайтуға арналған инвестициялық жобаларға жүйелі түрде қолдау көрсететін атап өтті.
Бұған дейін Solico Group Қазақстандағы ірімшік зауытын салуға 35,2 млрд теңге инвестиция салатыны хабарланды. Ауыл шаруашылығы министрлігі Иран холдингімен келісімге қол қойды.
Сонымен қатар Алматы базарларында заңсыз әкелінген 13 мыңнан астам тауық жұмыртқасы анықталды. Тәркіленген тауар мал қорымында биотермиялық әдіспен жойылды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
