Sergek Group такси жүргізушілерінің тәуекел рейтингін жасауды ұсынды
Қазақстанда такси қауіпсіздігін жасанды интеллект бақылайтын болады
Жасанды интеллект көлік қауіпсіздігін қамтамасыз етудің міндетті құралына айналуы тиіс. Астанада өткен «Қазақстандағы қалалық мобильділікті дамыту» II жыл сайынғы форумында Sergek Group бас директоры Евгений Ким осындай пікір білдірді. Оның айтуынша, қауіпсіздік белдігі мен ABS жүйесі кезінде жол қозғалысы мәдениетін өзгерткен болса, ендігі кезекте бұл рөлді ЖИ атқара алады, деп хабарлайды Kapital.kz іскерлік ақпарат орталығы компанияның баспасөз қызметіне сілтеме жасап.
Такси тасымалын реттеуге арналған сессияда Евгений Ким саланың басты бағыты өзгеруі керектігін айтты: ендігі мақсат – салдармен күресіп, айыппұл салу емес, апаттың алдын алу. Бүгінгі айыппұл, құқықтан айыру сияқты шаралардың көбі жол ережесі бұзылғаннан немесе жол-көлік оқиғасы орын алғаннан кейін ғана қолданылады. Ал жасанды интеллект ықтимал қауіпті ерте анықтап, апаттың алдын алуға мүмкіндік береді.
Кимнің сөзінше, жүйе жүргізушінің мінез-құлқын жан-жақты талдай алады. Бұған көлік жүргізу мәнері, жылдамдықты шамадан тыс арттыру, кенет тежеу мен қатты қозғалу, шаршау белгілері, жұмыс ауысымының ұзақтығы, ауа райы және жолдың қауіпті тұстары жатады. Осы деректер негізінде жүйе нақты бір көліктің апатқа ұшырау қаупі артқанын анықтайды.
Сонымен қатар баяндамада жүргізушілердің тәуекел-рейтингі тұжырымдамасына ерекше мән берілді. Қазір жолаушылар таксиде тек тазалық, сыпайылық сияқты пікірлерге негізделген рейтингті ғана көреді. Ал жүргізушінің жолдағы шынайы қауіпсіздік деңгейінен бейхабар. Осы ретте жасанды интеллект пікірлерге емес, нақты фактілерге сүйенетін объективті рейтинг құруға мүмкіндік береді. Оған жол ережесін бұзу тарихы, агрессивті жүргізу, түнде жұмыс істеу және еңбек пен демалыс режимін сақтау деректері кіреді. Нәтижесінде әр жүргізушінің нақты уақытта жаңарып отыратын тәуекел-профайлы жасалады.
«Бұрын технологиялар оқиғаның салдарын тіркейтін. Бүгінде жасанды интеллект қауіпті болжай алады. Ал ертеңгі ақылды қаланың міндеті жол апатынан кейін кінәліні іздеу емес, апаттың өзіне жол бермеу болады», – деді Евгений Ким.
Компания бұл тәсілдің нарықтағы барлық тарапқа тиімді екенін атап өтті. Жолаушы қауіпсіз сапарға шығады, агрегатор апаттар мен беделге келетін нұқсанды азайтады, сақтандыру компаниялары тарифтерді дәлірек есептейді, ал мемлекет жол қозғалысы қауіпсіздігін арттыратын қосымша құралға ие болады.
Айта кетейік, бұл бастама Sergek Group 2026 жылдың мамыр айында таныстырған жасанды интеллект негізіндегі жол қауіптерін превентивті анықтау платформасының жалғасы саналады. Егер алдыңғы әзірлеме мемлекеттік органдардың жұмысына бағытталған болса, бұл тәуекел-рейтинг тікелей коммерциялық тасымал нарығына – агрегаторларға, таксопарктер мен сақтандыру компанияларына бағытталған, деп атап өтті компанияда.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
