- Басты бет
- Технологиялар
- Алматыда Yandex роботаксиі таныстырылды
Алматыда Yandex роботаксиі таныстырылды
Қазақстандағы алғашқы роботакси Алматы мен Астанада іске қосылады
Көлік вице-министрі Дамир Қожахметов Алматыда Yandex Qazaqstan компаниясының роботаксиімен танысты, деп хабаралайды Kapital.kz іскерлік ақпарат орталығы министрліктің баспасөз қызметіне сілтеме жасап.
Ведомство мәліметінше, аталған ісөшара Көлік министрлігінің интеллектуалды көлік жүйелерін дамытуға және елімізде пилотсыз технологияларды енгізу перспективаларын зерделеуге бағытталған қызметі аясында өткізілді.
Компанияның роботаксиі пилоттық режимнен және шектеулі тестілеуден бастап кезең – кезеңімен іске қосылады деп жоспарланған.
«Бұл формат қаладағы нақты жағдайларды ескере отырып технологияларды енгізуге мүмкіндік береді. Сервисте диспетчерлермен тәулік бойы байланыс және сапарларды сақтандыру жоспарлануда. Пилотсыз көлікті басқару жүйесі автономды жүргізудің дәлелденген тәсілдеріне негізделеді, соның ішінде ЖИ, жол жағдайын үнемі бақылау және ойластырылған қауіпсіз әрекет ету сценарийлері. Тәжірибе жинақталып, тұрақтылық расталған жағдайда, қызмет ауқымы кеңейетін болады», делінген ақпаратта.
Қазір министрлік роботаксилерді пайдалану үшін нормативтік-құқықтық базаны қалыптастыру бағытында жүйелі жұмыс жүргізіп жатқанын атап өтті. Роботаксилерді пайдаланудың негізгі ұғымдарын енгізуді, оларды пайдалану тәртібін айқындауды, мемлекеттік органдардың өкілеттіктерін бөлуді және қажетті құқықтық инфрақұрылымды құруды көздейтін заңнамалық түзетулер әзірленді.
«Әлемдік тәжірибе көрсеткендей, пилотсыз технологиялар қазірдің өзінде бірқатар елдерде сәтті енгізіліп жатыр. Қазақстан үшін оларды жүзеге асыру экономиканың жоғары технологиялық секторларын дамыту үшін жаңа мүмкіндіктер ашады», деп қосты министрлікте.
Пилоттық жобаларды іске асыру үшін Алматы мен Астана қалалары цифрлық инфрақұрылымы дамыған және интеллектуалды көлік жүйелерінің қажетті элементтері бар ең перспективалы алаңдар ретінде қарастырылып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
