• Басты бет
• Экономика
• Халықаралық валюта қоры 2026 жылы Қазақстан экономикасы 4,6%-ға өседі деп болжайды

Халықаралық валюта қоры 2026 жылы Қазақстан экономикасы 4,6%-ға өседі деп болжайды

Ұйым миссиясы елдегі ІЖӨ тұрақтылығы мен инфляцияның бәсеңдегенін атап өтіп, мемлекеттік шығыстарды бақылауды күшейтуді ұсынды

ХВҚ Қазақстанға жасаған сапарының қорытындысын жариялады. Миссияның мәлімдемесіне сүйенсек, мұнайдың жоғары бағасы мен инвестиция ағыны арқасында ел экономикасы қарқынды дамып келеді. Сарапшылар макроэкономикалық тұрақтылықты сақтау үшін қатаң монетарлық саясатты жалғастыруды, бюджеттік тәртіпті күшейтуді және цифрлық теңгені белсендірек енгізуді ұсынады, деп хабарлайды Kapital.kz іскерлік ақпарат орталығының тілшісі Ұлттық банктің баспасөз қызметіне сілтеме жасап.

ХВҚ миссиясы Қазақстанда 3–12 маусым аралығында болды. Сапар қорытындысы бойынша ресми мәлімдеме жасалды.

«Миссия өкілдерінің пікірінше, әлемдік мұнай бағасының жоғары болуы, ішкі сұраныстың белсенділігі және инвестиция ағыны еліміздегі экономикалық өсімнің тұрақтылығын қамтамасыз етіп отыр. Халықаралық резервтер де жеткілікті деңгейде сақталып, шамамен 10 айлық импорт көлемін жаба алады. ХВҚ 2026 жылы экономикалық өсім 4,6% шамасында болады, сондай-ақ бюджет сальдосы мен елдің сыртқы экономикалық позициясы жақсарады деп болжайды. Бұл ретте бюджеттік тәртіп пен мемлекеттік шығыстардың тиімділігін арттыру — үкіметтің, Ұлттық банктің және Қаржы нарығын реттеу мен дамыту агенттігінің 2026–2028 жылдарға арналған макроэкономикалық тұрақтандыру және қаржы секторын дамыту жөніндегі бірлескен іс-қимыл бағдарламасын сәтті жүзеге асырудың басты шарты», - деп түсіндірді Ұлттық банк өкілдері.

Негізгі тәуекелдер ретінде ішкі сұраныстың шамадан тыс күшеюі, импорттық тауарлар бағасының қымбаттауы, жаһандық белгісіздік пен әлемдік нарықтардағы қаржылық талаптардың қатаңдауы (бұл инвестиция ағынына теріс әсер етуі мүмкін) атап өтілді. Сондай-ақ Каспий құбыр консорциумы жұмысындағы ықтимал іркілістер де қауіп тудыруы ықтимал.

ХВҚ сарапшылары мұнай бағасының жоғары болуы, бірлескен бағдарлама шараларының тиімді орындалуы және коммуналдық қызмет тарифтері реформасының жүйелі жүргізілуі мемлекеттік қаржы мен сыртқы сектордың тұрақтылығын арттырып, инфляциялық күтулерді ауыздықтауға септігін тигізетінін алға тартады.

«Қор мамандары инфляцияның 2025 жылғы қыркүйектегі 12,9%-дан 2026 жылғы мамырда 10,4%-ға дейін төмендегенін байқаған. Алайда оның деңгейі әлі де мақсатты межеден жоғары. Осыған байланысты ХВҚ инфляцияны көздеген көрсеткішке жеткізгенге дейін қатаң ақша-кредит саясатын ұстанудың маңыздылығын баса айтады. Ұлттық банктің артық өтімділікті азайту жөніндегі шаралары, соның ішінде ең төменгі резервтік талаптар нормативтерін арттыру және ноттарды шығару көлемін ұлғайту инфляциялық қысымды біртіндеп төмендетуде маңызды рөл атқаруда. Бұл шаралар нәтижелі болуы үшін экономиканың қызып кетуіне жол бермей, мемлекеттік және квазимемлекеттік қаржыландыру саласында неғұрлым ұстамды саясат жүргізу қажет. Бұған бюджет қаражаты мен Ұлттық қор ресурстарының жұмсалуын нақты уақыт режимінде бақылауға, оның ашықтығы мен мақсаттылығын арттыруға мүмкіндік беретін цифрлық теңгені енгізу оң ықпал етпек», - дейді сарапшылар.

ХВҚ бағалауынша, Қазақстанның макроэкономикалық саясатты жетілдіру және құрылымдық реформаларды жалғастыру арқылы инфляцияны одан әрі төмендетуге және экономикалық өсім әлеуетін арттыруға толық мүмкіндігі бар.

Бұған дейін қор Қазақстан Республикасының 2026 жылға арналған нақты ІЖӨ өсу болжамын 4,4%-ға дейін төмендеткен (нашарлатқан) болатын.

Қаңтар-сәуір айларында елдің ішкі жалпы өнімі 3,6%-ға, ал бес айдың қорытындысы бойынша 3,7%-ға өсті. AERC сарапшылары Қазақстан экономикасы 2026 жылы жиынтық ұсыныс моделі бойынша 4,8%-ға және жиынтық сұраныс моделі бойынша 4,9%-ға өседі деп болжайды. АERC болса 2026 жылы Қазақстанның ІЖӨ өсімі 5,5% деңгейінде болады деп күтеді. Ал Қазақстан үкіметі биылғы жылдың қорытындысы бойынша экономикалық өсімді 5,4% деңгейінде жоспарлап отыр.

2025 жылы Қазақстан экономикасы 6,5%-ға артқан болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз