Қазақстанда жаңа теміржолдар қай жерде салынады?
Елімізде ірі кен орындарына қарай жаңа теміржол желілерін тартып, халықаралық бағыттардағы көлік-логистикалық терминалдар санын екі есе арттыру көзделіп отыр
Қазіргі уақытта теміржолдардың өткізу қабілетін арттыру мақсатында жаңа жолдар салу және барын жаңғырту жобалары іске асырылуда. Сонымен қатар Шығыс – Батыс және Солтүстік – Оңтүстік бағыттарындағы терминалдар желісі кеңейіп келеді. Үкімет отырысында Көлік министрі Нұрлан Сауранбаев Премьер-министрге ірі өнеркәсіп орындарына қызмет көрсететін теміржол телімдерін де жаңғырту жоспарына енгізуді ұсынды, деп хабарлайды Kapital.kz іскерлік ақпарат орталығының тілшісі.
Нұрлан Сауранбаев теміржол желісінің өткізу мүмкіндігін арттыру үшін қазірдің өзінде 754 шақырым жаңа теміржол желісі салынып, жұмыс істеп тұрған 3 мың шақырым жолдың жаңартылып жатқанын еске салды.
«Теміржолдың өткізу қабілетін бұдан да жоғарылату үшін бірқатар жаңа жобаны жүзеге асыру қажет. Соның ішінде: Астана – Қарағанды телімінде үшінші жол, Арыс – Қазалы бағытында екінші жол салу, сондай-ақ Қызылжар – Шұбаркөл – Есіл және Индербор – Мақат телімдерін жаңғырту жұмыстары бар. Тек транзиттік бағыттарды дамытып қоймай, еліміздегі ірі өнеркәсіп және кен орындарының көлік қолжетімділігін қамтамасыз етуге де ерекше көңіл бөлуіміз керек. Осыған байланысты Қарағанды облысының Қарағайлы өнеркәсіптік аймағына қызмет көрсететін теміржол телімін жаңғырту қажет», - деді ол.
Сонымен қатар ол болашағы зор жобалар тізіміне Индербор – Орал теміржол желісінің құрылысын қосуды ұсынды. Бұл жоба Орал қаласымен тікелей теміржол қатынасын орнатып, Батыс Қазақстандағы кен орындарын игеруге жаңа мүмкіндіктер береді.
Нұрлан Сауранбаев Қазақстанның Қытай, Орталық Азия, Ресей, Еуропа, Парсы шығанағы мен Оңтүстік Азия елдерін байланыстыратын ең маңызды көпір екенін қадап айтты. Қазірдің өзінде Қытайдан Еуропаға жөнелтілетін теміржол жүктерінің 80%-ы Қазақстан аумағы арқылы өтеді.
«Еліміздің ішінде де, шетелде де көлік-логистикалық терминалдар желісі қарқынды дамып келеді. Нәтижесінде негізгі Шығыс – Батыс және Солтүстік – Оңтүстік бағыттарын қамтитын Қазақстанның біртұтас логистикалық экожүйесі қалыптасуда. Қазіргі уақытта халықаралық бағыттар бойында жеті терминал жұмыс істеп тұрса, тағы жеті нысан салу жоспарланған», - деді Нұрлан Сауранбаев.
Оның айтуынша, соңғы бес жылда транзиттік тасымал көлемі 20 миллионнан 33 миллион тоннаға дейін өскен. Алдағы уақытта бұл көрсеткішті 2030 жылға қарай 67 миллион тоннаға, ал 2040 жылға қарай 100 миллион тоннаға жеткізу көзделіп отыр.
Бұған дейін ҚТЖ екі жыл ішінде Қазақстан теміржолдарының төрттен бір бөлігін жаңғыртатыны хабарланған болатын. Алдағы төрт жылда Қазақстан 5 мың шақырым жаңа теміржол салады. Бақты – Аягөз теміржолының құрылысын 2027 жылдың соңына дейін аяқтау жоспарланған. Бұл желінің жалпы ұзындығы — 303 шақырым. Қытайға шығатын бұл жолдың құрылысы Абай облысында 2023 жылы басталған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
