Boeing 737 MAX ұшақтарын шығаруды айына 47 данаға дейін арттырмақ
Әуе компаниясы жаңа өндірістік көлемге алдағы айларда шығуды жоспарлап отыр
Boeing компаниясы АҚШ-тың Федералдық азаматтық авиация басқармасы (FAA) жүргізген тексерістен сәтті өтіп, 737 MAX ұшақтарының өндірісін айына 47 данаға дейін арттыруды жоспарлап отыр, деп жазады Интерфакс-Қазақстан Bloomberg агенттігіне сілтеме жасап.
«Біз өндіріс қарқынын күшейтіп жатырмыз және алдағы бірнеше айда айына 47 ұшақ шығару деңгейіне жетеміз деп күтіп отырмыз», – деді авиаконцерннің бас атқарушы директоры Келли Ортберг Bernstein конференциясында.
Қазіргі уақытта компания ай сайын 42 дана 737 MAX ұшағын шығарады. Ал келесі жылдың басында бұл көрсеткішті 52 ұшаққа дейін ұлғайтуды көздеп отыр.
2024 жылы FAA бірнеше қауіпті оқиғадан кейін осы модель өндірісіне шектеу енгізген болатын. Сол кезде реттеуші Boeing компаниясын өнім сапасынан гөрі өндірістік көрсеткіштерге көбірек мән берді деп айыптаған еді.
Өткен жылдың қазан айында реттеуші 737 MAX ұшағын шығарудың айлық шегін 38-ден 42 данаға дейін көтерді.
Bloomberg мәліметінше, өндірісті ұлғайту Boeing үшін аса маңызды. Бұл компанияның қаржылық жағдайын жақсартып, қарыз жүктемесін азайтуға, сондай-ақ тар фюзеляжды ұшақтар сегментінде Airbus компаниясымен тиімдірек бәсекелесуге мүмкіндік береді.
Сәрсенбі күнгі сауда-саттықта Boeing акцияларының бағасы 1,1%-ға өсті. Соңғы 12 айда компанияның нарықтық капитализациясы 9,8%-ға артып, 172,6 млрд долларға жеткен.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
