Google SpaceX-пен орбиталық дата-орталықтарды іске қосуды талқылап жатыр – БАҚ
Ол басқа компаниялармен де келіссөз жүргізуде
Alphabet Inc. құрамына кіретін америкалық Google Илон Масктың SpaceX компаниясымен орбиталық дата-орталықтарды іске қосу мәселесін талқылап жатыр, деп жазады The Wall Street Journal дереккөздерге сілтеме жасап. Солардың бірінің айтуынша, іздеу алыбы зымыран ұшырумен айналысатын басқа компаниялармен де келіссөз жүргізіп жатыр, деп хабарлайды Интерфакс-Қазақстан.
Google SpaceX-тің алғашқы инвесторларының бірі болған. Іздеу алыбына аэроғарыш компаниясының 6,1%-ы тиесілі. Компания биыл тарихтағы ең ірі IPO өткізуі мүмкін.
Өткен жылы Google Suncatcher жобасы аясында 2027 жылдан кешіктірмей ғарышқа спутник прототиптерін ұшыру жоспары барын мәлімдеген еді. Спутниктер Planet Labs-пен бірлесіп әзірленіп жатыр. Олардың көмегімен Google орбитаға компьютерлер жіберіп, жобаны тестілеп, кейін ауқымын кеңейтуді көздейді.
«Менің күмәнім жоқ: шамамен 10 жылдан кейін біз мұны дата-орталықтар салудың қалыпты тәсілі ретінде қабылдайтын боламыз», – деген еді Google CEO-сы Сундар Пичаи қараша айында Fox News-ке берген сұхбатында.
Бұған дейін SpaceX компаниясының бағалануы 1,75 трлн долларға жетуі мүмкін екені, ал IPO аясында тартылатын қаражат көлемі 50 млрд доллардан асуы ықтимал екені хабарланған болатын. Компания ішінде биржаға шығу жоспары Project Apex деп аталады. БАҚ мәліметінше, Илон Маск IPO-ны сирек кездесетін планеталар шеруі мен өзінің туған күніне (28 маусым) орайластырмақ. АҚШ-тағы SpaceX IPO-сы орбиталық дата-орталықтарға арналған мыңдаған спутникті өндіру мен ұшыру үшін ондаған миллиард доллар тартудың ең оңай жолы болуы мүмкін.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
