Серік Жұманғарин: Мұнай өндіру жоспары орындалса, ЖІӨ өсімі 6%-дан асар еді
Қазір Қазақстан экономикасының өсімін шикізаттық емес салалар қамтамасыз етіп отыр
Премьер-министрдің орынбасары – ұлттық экономика министрі Серік Жұманғарин 2026 жылдың қаңтар-сәуір айларында Қазақстанда мұнай өндіру көлемі жоспардан 5 млн тоннаға төмен болғанын мәлімдеді. Оның айтуынша, егер осы көлем сақталған жағдайда, экономикалық өсім 6%-дан асуы мүмкін еді, деп хабарлайды Kapital.kz іскерлік ақпарат орталығының тілшісі.
Бұған дейін төрт ай қорытындысы бойынша елдің ЖІӨ өсімі 3,6% болғаны хабарланған еді.
«Төрт айдың ішінде біз шамамен 5 млн тонна мұнай өндіре алмадық. Егер осы 5 млн тонна мұнай экономикаға қосымша құйылғанда не боларын елестетіп көріңіздерші. Онда өсім 6%-дан асып кетер еді», – деді Серік Жұманғарин мәжіліс кулуарында.
Ол мұнай секторының қосымша қолдауынсыз да Қазақстан экономикасы өсіп жатқанын атап өтті. Қазіргі таңда негізгі драйверлер ретінде өңдеу өнеркәсібі, құрылыс және сауда салалары аталып отыр.
«ЖІӨ өсімінің драйверлері қандай? Өңдеу өнеркәсібі – шамамен 10%. Құрылыс, сауда салалары да өсіп жатыр», – деді министр.
Еске салайық, 2026 жылдың қаңтар-сәуір айларында Қазақстан экономикасының өсімі 3,6% болды. Халықаралық валюта қоры Қазақстанның 2026 жылға арналған нақты ЖІӨ өсімі бойынша болжамын 4,4%-ға дейін төмендетті.
Ал AERC Қазақстан экономикасы 2026 жылы жиынтық ұсыныс моделі бойынша 4,8%-ға, ал жиынтық сұраныс моделі бойынша 4,9%-ға өседі деп болжайды.
Сонымен қатар Қазақстан үкіметі биылғы жылдың қорытындысы бойынша экономикалық өсімді 5,4% деңгейінде күтуде. Ал 2025 жылы Қазақстанның ЖІӨ-сі 6,5%-ға өскен болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
