Қазақмыста бағалы металдары көп кен қорытпалары ұрланған
Кәсіпорында жанар-жағармай ұрлау схемасы да анықталды
Ұлытау облысындағы Корпорация Казахмыс кәсіпорындарында құрамында бағалы металдар көп кен қорытпалары мен жанар-жағармайды ұрлау схемалары әшкереленді, деп хабарлайды Kapital.kz іскерлік ақпарат орталығы Ішкі істер министрлігінің баспасөз қызметіне сілтеме жасап.
«Ұлытау облысында өткен жылдан бері полиция Казахмыс корпорациясы аумағынан ұрлық жасауға қатысы бар бірнеше қылмыстық топтың әрекетін тоқтатты. Қабылданған шаралардың нәтижесінде келтірілген шығынның 94,5%-ы өтелді», – деп хабарлады ІІМ.
Мәселен, жергілікті қылмыстық орта өкілдерінің жетекшілігімен әрекет еткен топ мүшелері сотталған. Олар құрамында бағалы металдар мөлшері жоғары кен қорытпаларын ұрлау схемасын ұйымдастырған.
«Тек биылдың өзінде полицейлер ірі көлемде шығын келтірілген төрт ұрлықты ашты. 7 мамыр күні арнайы мемлекеттік органдармен бірлесіп, компания аумағынан жанармай ұрлауға қатысты заңсыз әрекеттің жолы кесілді. Жедел іс-шаралар барысында жанар-жағармайды ұрлауды ұйымдастырды және оны өткізумен айналысты деген күдікке ілінген тұлғалар ұсталды. Бір тоннадан астам жанармай, ірі көлемдегі ақша, көлік құралдары, қару-жарақ пен оқ-дәрілер және қылмыстық схемаға пайдаланылған өзге де айғақ заттар тәркіленді», – деп мәлімдеді министрлік.
Тергеу мәліметінше, ұрлық арнайы техниканы жалған жанармай құю арқылы және құжаттарды қолдан жасау жолымен жүзеге асырылған. Сонымен қатар кейбір күзет құрылымы қызметкерлерінің көмектескені анықталған.
«Қазіргі уақытта тергеу-жедел іс-шаралар кешені жүргізіліп жатыр, қаржы-шаруашылық құжаттарына талдау жасалуда. Келтірілген шығын көлемі анықталуда, алдын ала мәлімет бойынша ол аса ірі болуы мүмкін», – деді ІІМ ұйымдасқан қылмысқа қарсы күрес департаментінің өкілі Қуандық Алпыс.
Бұған дейін Qarmet мүлкін ұрлау фактілері бойынша тергеу басталғаны хабарланған болатын. 2024 жылы Qarmet кәсіпорнынан жанар-жағармай ұрлаған қылмыстық топ ұсталған. Ұйымдасқан қылмыстық топ әрекетінен кәсіпорынға 50 млн теңгеден астам шығын келген.
Сондай-ақ 2024 жылдың шілдесінде Петропавл машина жасау зауытының бұрынғы директоры сотталғаны хабарланған еді. Ол 100 мың доллар көлемінде пара алды деп танылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
