Алматыда заңсыз көше саудасына қарсы бақылау күшейтіледі
Қалада 1595 заңсыз сауда нысаны анықталды
Алматы әкімі Дархан Сатыбалды заңсыз стационарлық емес сауда нысандары мен қоғамдық тамақтану орындарының жазғы алаңдарына қатысты кеңес барысында заңсыз көше саудасы нысандарын су мен электр желілерінен ажыратуды тапсырды, деп хабарлайды Kapital.kz іскерлік ақпарат орталығы оңтүстік астана әкімдігінің баспасөз қызметіне сілтеме жасап.
Қалалық кәсіпкерлік және инвестициялар басқармасының басшысы Берікбол Мәндібаев мониторинг қорытындысы бойынша 1595 заңсыз стационарлық емес сауда нысаны анықталғанын мәлімдеді. Оның ішінде 509 нысан мемлекеттік қор жерінде орналасқан, 210-ы жер телімін мақсатсыз пайдалану фактісімен жеке аумақтарда орнатылған, ал 876 нысан бекітілген дизайн-код талаптарын бұза отырып жұмыс істеген. Оның айтуынша, мұндай нысандар көбіне жаяу жүргіншілерге кедергі келтіріп, қаланың сәулеттік келбетіне нұқсан келтіреді және тұрғындардың шағымына себеп болады.
Алматы әкімі Дархан Сатыбалды заңсыз сауда нысандарына қатысты қатаң шаралар қабылдауды тапсырды. Ол тәртіп орнату жұмыстары ашық, жүйелі және заң аясында жүргізілуі тиіс екенін атап өтті.
«Ең алдымен жауапкершілік аудан әкімдеріне жүктеледі. Олар күн сайын аралап, заңбұзушылықтарды анықтауы керек. Жыл басынан бері небәрі 157 нысан сүрілген — мегаполис үшін бұл өте төмен қарқын. Электр және су желілерінен ажырату жұмыстарын бастау қажет, полициямен бірлесіп меншік иелерін әкімшілік жауапкершілікке тарту керек. Ешқандай ерекшелік болмауы тиіс. Бір айдан кейін нақты нәтижелер күтемін», — деді Дархан Сатыбалды.
Қазіргі уақытта қалада стационарлық емес сауда нысандарын орналастыруға арналған 142 орын бекітілген. Жыл соңына дейін олардың саны ұлғайтылмақ.
Кеңес барысында қоғамдық тамақтану орындарының қызметін реттеу мәселесі де қаралды. Қазір қаладағы қоғамдық тамақтану орындарының шамамен 30%-ы жазғы алаңдарды пайдаланады. Алайда қолданыстағы реттеу тетіктері олардың уақытша әрі күрделі құрылыс нысаны еместігін толық ескермейді. Соның салдарынан келісу рәсімдері қиындап, рұқсатсыз орналастыру фактілері туындап отыр. Осыған байланысты қалалық кәсіпкерлік және инвестициялар басқармасы кәсіпкерлер үшін рәсімдерді жеңілдетуге бағытталған қолданыстағы ережелерге өзгерістер енгізуді ұсынды.
Еске салайық, 2025 жылдың маусымында Алматыдағы «Ақсай-4» шағынауданында сот шешімімен Арыстан базары аумағындағы 2 мың шаршы метрден астам сауда алаңын бұзу басталған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
