- Басты бет
- Технологиялар
- Каспий теңізі арқылы ТОБЖ тартуға арналған суасты кабелі Әзербайжанға жөнелтілді
Каспий теңізі арқылы ТОБЖ тартуға арналған суасты кабелі Әзербайжанға жөнелтілді
Талшықты-оптикалық байланыс желісі Құрық портынан Әлят портына кетті
Бұл туралы «Қазақтелеком» АҚ басқарма төрағасы Бағдат Мусин өзінің Facebook парақшасында жазды, деп хабарлайды Kapital.kz іскерлік ақпарат орталығы.
Ұлттық телекоммуникация операторының басшысы жобаның ең күрделі кезеңдерінің бірі аяқталғанын, суасты кабелі Құрық портына сәтті жеткізіліп, баржаға тиелгенін мәлімдеді.
Бағдат Мусин өнеркәсіп, қаржы, жасанды интеллект және цифрлық даму министрліктеріне, сондай-ақ кеден қызметтеріне алғыс айтты. Оның сөзінше, аталған мекемелердің үйлесімді жұмысының арқасында стратегиялық жүк өте қысқа мерзімде рәсімделген.
«Қазақтелеком» басшысы кабельдің аман-есен, еш зақымсыз жеткізілуі өте маңызды екенін атап өтті.
Бұған дейін Премьер-министрдің орынбасары – Жасанды интеллект және цифрлық даму министрі Жаслан Мәдиев Транскаспий талшықты-оптикалық желісін 2026 жылдың үшінші тоқсанында пайдалануға беру жоспарланғанын хабарлаған болатын.
Қазақстан мен Әзербайжан 2026 жылдың тамыз айында Каспий түбімен байланыс желісін тартуды көздеп отыр. Ұзындығы шамамен 380 шақырымды құрайтын бұл жоба Каспий теңізінің тарихындағы тұңғыш суасты талшықты-оптикалық байланыс желісі болмақ.
Сонымен қатар, осы жылдың наурыз айында Қазақстан, Өзбекстан және Әзербайжан арасында Каспий теңізінің түбімен өтетін тағы бір ауқымды энергетикалық жоба мақұлданды. Бұл келісім аймақтағы жаңартылатын энергияны Қара теңіз арқылы Еуропа елдеріне экспорттауға мүмкіндік береді.
Мәжілістің жалпы отырысында Энергетика министрі Ерлан Ақкенженов бұл жобаның негізгі элементі Каспий түбімен жоғары вольтты тұрақты тоқ кабелін тарту екенін айтты.
Оның сөзінше, бұл техникалық тұрғыдан күрделі болғанымен, Еуропалық Одақтың электр энергетикасы нарығына тікелей шығуға жол ашатын стратегиялық тұрғыдан аса маңызды шешім.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
