• Басты бет
• Технологиялар
• Astana Hub Tech Orda 2026 бағдарламасына IT-мектептерді іріктеуді бастады

Astana Hub Tech Orda 2026 бағдарламасына IT-мектептерді іріктеуді бастады

Мемлекеттік бағдарлама аясында бір студенттің оқуына 500 мың теңгеге дейін қаржы бөлінеді

Astana Hub Tech Orda 2026 бағдарламасына серіктестерді іріктеу басталғанын жариялады. IT-мамандар даярлау бағдарламасына қатысу үшін жекеменшік бейінді мектептер мен компаниялар өтінім бере алады, деп хабарлайды Kapital.kz іскерлік ақпарат орталығының тілшісі технопарктың баспасөз қызметіне сілтеме жасап.

Бағдарламаға өтінім қабылдау 2026 жылғы 27 мамырға дейін astanahub.com платформасында жүргізіледі.

Бағдарлама аясында бір студенттің оқу ақысы ішінара немесе толық көлемде өтеледі. Қаржыландыру көлемі 500 мың теңгеге дейін жетеді.

IT-мектептерді іріктеу және ваучерлерді бөлу механизмі үш кезеңнен тұрады. Алғашқы кезеңде тәуелсіз комиссия жекеменшік IT-мектептер мен оқу бағдарламаларын аккредиттеуден өткізеді. Кейін алгоритм арқылы әр курсқа бөлінетін ваучер саны анықталады. Бұл ретте түлектерді жұмысқа орналастыру көрсеткіші, өңірлік мектептерге берілетін қосымша артықшылықтар, сондай-ақ жасанды интеллект, product management және Agile секілді басым бағыттарға сәйкестік ескеріледі. Соңғы кезеңде мектептер студенттерді іріктеп, оқу ваучерлерін бөледі.

Бағдарламаға қатысу үшін IT-мектептер мен IT-компаниялар белгіленген біліктілік талаптарына сай болуы қажет. Курстар еңбек нарығында сұранысқа ие IT-бағыттарға бағытталып, практикалық дайындықты, оқу нәтижесін бағалау жүйесін және түлектердің нақты құзыреттерін қамтуы тиіс. Оқыту онлайн, офлайн немесе гибрид форматта жүргізілуі мүмкін.

2025 жылы бағдарлама аясында 80 IT-мектеп аккредиттеуден өтіп, веб-әзірлеу, 3D-дизайн, AR/VR әзірлеу, киберқауіпсіздік, Big Data, заттар интернеті (IoT), мобильді қосымша әзірлеу, операциялық жүйелер жасау және GameDev бағыттары бойынша 160 курс ұсынды.

«Қазіргі таңда Tech Orda түлектерін жұмысқа орналастыру деңгейі 90%-ды құрайды, ал орташа жалақы көлемі — 612 мың теңге. Түлектер ірі ұлттық және халықаралық компанияларда, сондай-ақ жекеменшік секторда жұмыс істейді. Олардың қатарында Kaspi.kz, Halyk Bank, KPMG, Ernst & Young, Теңізшевройл, ҚазМұнайГаз, Freedom Finance, Kcell, Air Astana және Kolesa Group бар», — деп мәлімдеді Astana Hub.

Бұған дейін жасанды интеллект және цифрлық даму министрлігі Red Team & Blue Team Cyber Academy білім беру бағдарламасына өтінім қабылдау басталғанын хабарлаған болатын. Astana Hub-пен бірлесіп Tech Orda бағдарламасы және «Мемлекеттік техникалық қызмет» АҚ базасында іске асырылатын жоба ақпараттық қауіпсіздік саласындағы кадрлық резервті қалыптастыруға бағытталған және тегін оқуға 100 орын қарастырылған. Сонымен қатар президент жанындағы Мемлекеттік басқару академиясында AI Governance 500 стратегиялық бағдарламасы іске қосылды. Alem.ai алаңында жасөспірімдерге жасанды интеллект пен цифрлық технологиялар оқытылады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз