Қазақстан Түркияға экспорт көлемін $630 млн-ға арттыруға дайын
Былтыр екі ел арасындағы тауар айналымы 5,4 млрд доллардан асты
Қазақстан президенті Қасым-Жомарт Тоқаев пен Түркия Президенті Реджеп Тайип Эрдоган Стратегиялық ынтымақтастық жөніндегі жоғары деңгейлі кеңестің алтыншы отырысын өткізді, деп хабарлайды Ақорда баспасөз қызметі.
«Қазіргі таңда қазақ-түрік қатынастары кеңейтілген стратегиялық серіктестік рухында қарқынды дамып келеді. Біздің мемлекеттер арасында ешқандай келіспеушіліктер мен қайшылықтар жоқ. Мемлекетаралық және үкіметаралық байланыстар нығайып келеді. Түрік делегациясының құрамында депутаттар мен партия мүшелерінің болуы парламентаралық ынтымақтастықтың да жоғары деңгейде екенін көрсетеді. Екіжақты экономикалық байланыстар қарқынды кеңейіп жатыр. Түркия – біздің ірі инвесторларымыздың бірі. Бүгінде сіздердің елдеріңізден экономикамызға 6 млрд доллар инвестиция тартылды. Қазақстанның Түркияға салған инвестициясы да өсіп, 2,5 млрд долларға жуықтады. Сонымен қатар Түркия біздің негізгі бес сауда серіктесіміздің қатарына кіреді. Екі халық арасындағы мәдени-гуманитарлық байланыстар қарым-қатынасымызды жалғайтын баға жетпес көпірге айналды. Біз осы оң үрдістерді сақтауға және өзара ықпалдастық аясын кеңейтуге мүдделіміз. Бүгін біз «Мәңгілік достық және кеңейтілген стратегиялық серіктестік туралы» декларация қабылдаймыз. Бұл маңызды құжат қазақ-түрік қатынастарының дамуына жаңа серпін беретіні сөзсіз. Бізді ортақ мақсат-мүдделер біріктіреді, сондықтан алда зор мүмкіндіктер мен перспективалар бар деп толық сеніммен айтуға болады», – деді Қасым-Жомарт Тоқаев.
Президенттің айтуынша, бүгінде Түркия әлеуметтік-экономикалық дамудың жаңа кезеңіне өтіп, түрлі салада елеулі жетістіктерге қол жеткізген.
«Қуатты экономикасы мен беделді дипломатиясы бар Түркия Еуропа мен Азияны, сондай-ақ тұтас түркі әлемін байланыстыратын «алтын көпір» ретінде мойындалды. Біз Түркияның жетістіктерін ұлттық мүдделерді қорғауға бағытталған тынымсыз еңбегіңіздің нәтижесі деп бағалаймыз», – деді мемлекет басшысы.
Өткен жылдың қорытындысы бойынша екі ел арасындағы тауар айналымы 8,8%-ға өсіп, 5,4 млрд доллардан асты. Қасым-Жомарт Тоқаев сауда көлемін кеңейту және тауар айналымын әртараптандыру үшін қолайлы жағдай қалыптастырудың маңызын атап өтті. Оның айтуынша, Қазақстан қазірдің өзінде Түркияға 34 түрлі тауар бойынша экспорт көлемін жалпы сомасы 630 млн доллардан астам көлемге ұлғайта алады. Сондай-ақ президент екі елдің қаржы орталықтары мен цифрлық сауда платформалары арасындағы серіктестік, сондай-ақ Астанада өтіп жатқан қазақ-түрік бизнес-форумының нәтижелері сауда-экономикалық байланыстарды одан әрі тереңдетуге ықпал ететініне сенім білдірді.
Бұған дейін Қасым-Жомарт Тоқаев пен Реджеп Тайип Эрдоган шағын құрамда келіссөздер өткізген болатын.
Еске салайық, 2026 жылғы 13 мамырда Түркия президенті Қазақстанға мемлекеттік сапармен келді. Мемлекет басшылары екіжақты қатынастардың қазіргі жағдайы мен даму перспективаларын талқылауда. Ал 15 мамырда Түркістанда Түркі мемлекеттері ұйымына мүше елдер көшбасшыларының бейресми саммиті өтеді. Саммит тақырыбы – «Жасанды интеллект және цифрлық даму».
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
