Қазақстанда отандық дәрі-дәрмек өндірісі 40%-ға жетті
Фармацевтика саласына 360 млрд теңге инвестиция құйылады
2025 жылы Қазақстандағы фармацевтикалық өнім өндірісінің көлемі 191,1 млрд теңгені құрап, өткен жылмен салыстырғанда 8,7%-ға артты, деп хабарлайды Kapital.kz іскерлік ақпарат орталығы Денсаулық сақтау министрлігіне сілтеме жасап.
Ведомство мәліметінше. салаға салынған инвестиция көлемі 142,8 млн АҚШ долларына жетсе, фармацевтикалық өнім экспорты 84 млн АҚШ долларына дейін өсті. Бұл туралы Мәжілістің әлеуметтік-мәдени даму комитетінің «Фармацевтикалық индустрияны дамыту перспективалары» тақырыбында өткен көшпелі отырысынан кейін хабарланды.
Қазіргі таңда елде 209 отандық тауар өндіруші тіркелген, оның ішінде 43 дәрілік зат өндіруші және 166 медициналық бұйым өндіруші бар. Қазақстандық өндірушілердің табиғи көлемдегі үлесі 39,8%-ға жетіп отыр, бұл дәрілік заттардың таңбалануы мен қадағалану жүйесі деректерімен расталады.
Денсаулық сақтау вице-министрі Тимур Мұратов саланы қолдаудың негізгі тетіктерінің бірі ретінде ұзақ мерзімді шарттар мен инвестициялық келісімдер екенін атап өтті.
2026 жылдың басындағы жағдай бойынша 31 қазақстандық өндірушімен 2 мыңнан астам атаудағы дәрілік заттар мен медициналық бұйымдарды жеткізуге арналған 83 ұзақ мерзімді шарт қолданыста. 2025 жылдың желтоқсанынан бастап жалпы сомасы шамамен 360 млрд теңгені құрайтын инвестициялар туралы 7 келісім жасалған. Бұл жобаларды іске асыру 474 жаңа өнім атауын өндіруді жолға қоюға, 1 140-тан астам жұмыс орнын құруға және отандық фармацевтиканың экспорттық әлеуетін кеңейтуге мүмкіндік береді.
2026 жылдың ақпанында Қазақстан Дүниежүзілік денсаулық сақтау ұйымының бағалауы бойынша дәрілік заттар айналымын реттеудің ұлттық жүйесінің жетілу деңгейі бойынша ТМД елдерінің ішінде үшінші деңгейге жеткен алғашқы ел болды.
Сонымен қатар, дәрілік заттарды тіркеу мерзімдерін қысқарту мақсатында «бірыңғай терезе» қағидаты бойынша «Композиттік қызмет» пилоттық жобасы іске асырылуда. Соның нәтижесінде рәсімдер уақыты 210 күннен 100 күнге дейін, яғни екі еседен астам қысқарды. Жоғары реттеушілік стандарттары бар елдерден келетін препараттар үшін жеделдетілген тіркеу тәртібі енгізіліп, мерзім 15 жұмыс күніне дейін қысқартылды.
«Бұл жобаны іске асыру халықтың заманауи препараттарға қолжетімділігін жеделдетуге, мемлекет үшін әкімшілік жүктемені азайтуға және бизнес үшін болжамды жағдайлар жасауға мүмкіндік береді», – деді Тимур Мұратов.
Вице-министр сондай-ақ дәрілік заттарды таңбалау жүйесін енгізу туралы хабарлады. Бұл пациент деңгейіне дейін толық қадағалауды қамтамасыз етіп, мемлекеттік бақылау мен реттеу тиімділігін арттыруға мүмкіндік береді.
«Жүйеге тауар айналымына қатысатын барлық тараптар – дәріханалар, қоймалар, дистрибьюторлар және медициналық ұйымдар енгізілген, бұл бірыңғай талдамалық базаны қалыптастыруға және дәрілік заттардың қозғалысының ашықтығын қамтамасыз етуге мүмкіндік береді», – деді ол.
2025 жылдың наурыз айынан бастап биологиялық белсенді қоспаларды таңбалау бойынша пилоттық жоба іске асырылуда, сондай-ақ медициналық бұйымдарды таңбалау бойынша пилоттық жобаны іске қосу жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
