Егін өсірушілерді форвардтық қаржыландыру көлемі 29,5 млрд теңгеге жетті
Күзгі маусымда 478 мың тонна астық және майлы дақыл жеткізуге келісімшарт жасалды
Ауыл шаруашылығы өнімдерін форвардтық сатып алу бағдарламасы аясында «Азық-түлік корпорациясы» фермерлерге 29,5 млрд теңге төледі. Бұл 2025 жылмен салыстырғанда 11,6 млрд теңгеге көп, деп хабарлайды Kapital.kz іскерлік ақпарат орталығы ауыл шаруашылығы министрлігінің баспасөз қызметіне сілтеме жасап.
Ұлттық астық операторы көктемгі егіс жұмыстарына қаржыландыруға өтінім қабылдауды өткен жылдың желтоқсан айында бастаған. Бұл аграрийлерге егіс науқанына алдын ала дайындалуға мүмкіндік берді.
2026 жылғы 15 мамырдағы жағдай бойынша күзде жеткізілетін 478 мың тонна астық және майлы дақыл бойынша келісімшарттар жасалған. Оның ішінде негізгі үлес дәстүрлі түрде бидайға тиесілі – 334,3 мың тонна. Сонымен қатар ауыл шаруашылығы құрылымдары егін жиналғаннан кейін «Азық-түлік корпорациясы» қорына 95 мың тонна күнбағыс, рапс және зығыр тұқымын жеткізуді жоспарлап отыр. Бұл өткен аграрлық маусыммен салыстырғанда 2,5 есе көп.
«Азық-түлік корпорациясы» ҰК» АҚ басқарма төрағасы Асылхан Жуашевтің айтуынша, майлы дақылдарға қызығушылықтың артуына бірнеше фактор әсер еткен.
Оның сөзінше, майлы дақылдардың нарықтық құны бидайға қарағанда жоғары әрі оларға отандық өңдеу кәсіпорындары мен сыртқы нарықта сұраныс бар. Ел ішінде жаңа өндірістік қуаттардың іске қосылуына байланысты шикізатқа деген қажеттілік те артып келеді.
«Қосымша ынталандырушы фактор ретінде егіс алқаптарын әртараптандыруға және монодақылға тәуелділікті төмендетуге бағытталған мемлекеттік қолдау шараларын атап өтуге болады. Атап айтқанда, «Азық-түлік корпорациясы» майлы дақыл өндірушілерін форвардтық қаржыландыру лимитін кеңейтті. Нәтижесінде фермерлер жаңа аграрлық маусымда күнбағыс пен басқа да майлы дақылдарды жеткізуге екі есе көп өтінім берді. Біз ауыл шаруашылығы өндірушілерінің бидай өсіруден нарыққа бағытталған өсімдік шаруашылығына біртіндеп көшіп жатқанын көріп отырмыз. Бұл мемлекеттік аграрлық саясаттың басымдықтарына сәйкес келеді», – деді Асылхан Жуашев.
Форвардтық қаржыландыру шағын және орта шаруашылықтарды қолдаудың ең сұранысқа ие құралдарының бірі саналады. Бағдарлама фермерлерге егіс жұмыстарын жүргізуге, техниканы жөндеуге және қажетті ресурстарды сатып алуға айналым қаражатын уақытылы тартуға мүмкіндік береді. Сонымен қатар болашақ өнімді өткізудің кепілдендірілген арнасын қамтамасыз етеді.
Бұған дейін «Азық-түлік корпорациясы» сатып алынатын дақылдар тізімін кеңейткені хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
