• Басты бет
• Технологии
• Екібастұзда қуаттылығы 1 ГВт болатын дата-орталық салынады

Екібастұзда қуаттылығы 1 ГВт болатын дата-орталық салынады

Қазақстан Aleria компаниясымен егеменді ЖИ инфрақұрылымын құруға келісті

ҚР Жасанды интеллект және цифрлық даму министрлігі, «Қазақтелеком» және Aleria компаниясы стратегиялық ынтымақтастық туралы меморандумға қол қойды, деп хабарлайды Kapital.kz іскерлік ақпарат орталығы.

Астанадағы Alem AI халықаралық орталығында Қазақстанның цифрлық болашағы үшін маңызды құжатқа қол қою рәсімі өтті. Үшжақты келісім егеменді бұлттық технологиялар мен жасанды интеллект инфрақұрылымын дамытуға бағытталған. Шараға Премьер-Министрдің орынбасары – Жасанды интеллект және цифрлық даму министрі Жаслан Мәдиев, «Қазақтелеком» АҚ Басқарма Төрағасы Бағдат Мусин және Aleria компаниясының бас атқарушы директоры Эрик Леандри қатысты.

Меморандум Павлодар облысының Екібастұз қаласында бой көтеретін Data Center Valley жобасы. бойынша ынтымақтастықты көздейді. Бұл нысан Орталық Азиядағы ең ірі деректерді өңдеу орталықтарының кампусына айналады деп күтіліп отыр. Жобаның жоспарланған қуаттылығы: 1 гигаватқа (ГВт) дейін деп көзделіп отыр.

«Жоба іске қосылғаннан кейін Қазақстанды цифрлық инфрақұрылымның өңірлік хабы ретінде бекітіп, егеменді жасанды интеллектіні дамытуға мүмкіндік береді», делінген ақпаратта.

Меморандум тараптардың инвестиция тартуға, ұлттық инфрақұрылымды дамытуға және Қазақстандағы технологиялық шешімдерді локализациялауға ерекше назар аудара отырып, жобаны жүзеге асырудағы бірлескен ниетін көрсетеді.

Меморандум аясында тараптар инвестиция тарту, технологиялық шешімдерді локализациялау және ЖИ-дің тұрақты экожүйесін құру бойынша бірлесе жұмыс істейтін болады. Құжат әрбір қатысушының рөлін нақты айқындап, білім алмасу мен біріккен бастамаларды жүзеге асыруды көздейді.

Айта кетейік, Aleria - штаб-пәтері Абу-Дабиде орналасқан, егеменді ЖИ инфрақұрылымы мен платформалары саласындағы компания. Компания жергілікті инфрақұрылымды дамытуды, технологияларды локализациялауды және ЖИ-ді ұлттық бақылаумен басқарудың ұзақ мерзімді институционалдық әлеуетін қолдай отырып, ұлттық ауқымда егеменді ЖИ мүмкіндіктерін жасау үшін үкіметтермен және кәсіпорындармен ынтымақтасады.

Сонымен қатар бұл компания мемлекеттік деңгейде егеменді ЖИ шешімдерін енгізу үшін NVIDIA және DDN компанияларымен серіктестікте жұмыс істейді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз