• Басты бет
• Недвижимость
• Зейнетақы жинақтарының артық бөлігін ипотекаға пайдалану ережелері қатаңдатылды

Зейнетақы жинақтарының артық бөлігін ипотекаға пайдалану ережелері қатаңдатылды

Жаңа норма 17 сәуірден бастап күшіне енеді

2026 жылғы 17 сәуірден бастап Қазақстанда зейнетақы жинақтарының артық бөлігін тұрғын үй жағдайын жақсартуға пайдалану шарттары өзгереді. Бұған дейін бұл қаражатты екінші деңгейлі банктердегі ипотека бойынша негізгі қарызды да, пайыздарды да өтеуге бағыттауға болатын. Енді қаражат тек негізгі қарызды өтеуге ғана жұмсалады, деп хабарлайды Kapital.kz іскерлік ақпарат орталығы Отбасы банктің мәліметіне сілтеме жасап.

«2026 жылғы 17 сәуірден бастап зейнетақы жинақтарының артық бөлігін екінші деңгейлі банктердегі ипотекалық қарызды мерзімінен бұрын толық немесе ішінара өтеу кезінде тек негізгі қарызды жабуға пайдалануға болады. Ал сыйақы мен ай сайынғы төлем құрамына кіретін өзге де берешектерді қарыз алушы өз қаражаты есебінен төлеуі тиіс», – делінген хабарламада.

Бұл өзгерісті Өнеркәсіп және құрылыс министрлігі тұрғын үй жағдайын жақсарту үшін біржолғы зейнетақы төлемдерін пайдалану қағидаларына енгізді.

Бұған дейін осындай талап Отбасы банкінің қарыз алушылары үшін де енгізілген болатын.

Тұрғын үй құрылыс жинақ банкінде Kapital.kz іскерлік ақпарат орталығының тілшісіне 17 сәуірге дейін қарыз алушылар зейнетақы артықтарын ипотека бойынша сыйақыны да, негізгі қарызды да өтеуге пайдалана алғанын түсіндірді.

Банк сайтында 17 сәуірден бастап екінші деңгейлі банктердегі қарызды толық немесе ішінара өтеу үшін зейнетақы қаражатын пайдалануды растау кезінде enpf-otbasy.kz платформасында негізгі қарыз қалдығы көрсетілген несие берешегі туралы анықтаманың жаңа нысанын тіркеу қажет екені көрсетілген.

«Отбасы банк екінші деңгейлі банктерге өз клиенттеріне негізгі қарыз қалдығы көрсетілген несие берешегі туралы анықтама беру қажеттілігі жөнінде тиісті хаттар жолдады», – деп мәлімдеді банк.

Еске салайық, 2026 жылғы 31 қаңтардан бастап тұрғын үй жағдайын жақсарту үшін біржолғы зейнетақы төлемдерін пайдалану қағидаларына өзгерістер енгізілген болатын. Соған сәйкес, Отбасы банкінде ипотеканы мерзімінен бұрын өтеу кезінде зейнетақы қаражаты тек негізгі қарызды жабуға ғана бағытталады. Яғни, енді ай сайынғы төлемді толықтай зейнетақы есебінен өтеу мүмкін емес. Пайыздар мен өзге де төлемдерді қарыз алушы өз қаражаты есебінен төлеуі тиіс.

Айта кетейік, ипотека бойынша ай сайынғы төлем бірнеше бөліктен тұрады:

• негізгі қарыз – тұрғын үй сатып алу үшін берілген қаражат;

• банктің сыйақысы – қарызды пайдаланғаны үшін есептелетін пайыз;

• мерзімі өткен берешек пен айыппұлдар – төлем уақытында жасалмаған жағдайда есептеледі;

• қайта құрылымдау кезінде кейінге қалдырылған төлемдер;

• алдын ала қарыз берілген жағдайда депозиттегі жинақтар.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз