Отбасы банк әйелдерге арналған «Ұмай» ипотекасын қайта іске қосады

«Ұмай» және «Жасыл ипотека» бағдарламалары аясында Отбасы банк алғашқы кезеңде 2 мыңнан астам несие беруді жоспарлап отыр, деп хабарлайды Kapital.kz іскерлік ақпарат орталығы банктің баспасөз қызметіне сілтеме жасап.

Қаржы институты Азия даму банкімен 90 млрд теңге көлемінде қарыз беру туралы келісімге қол қойғанын айта кетті. Бұл қаражат ипотекалық несиелерді беруге бағытталады.

«Ұмай» және «Жасыл ипотека» бағдарламаларының іске қосылатын күні қосымша хабарланады.

«Дәл өз баспанасының болуы әйелге сенімділік беріп, отбасы үшін тұрақтылық пен болашаққа деген қорғаныш сезімін қалыптастырады. Сондықтан «Ұмай» бағдарламасы сұранысқа ие. Ол әйелдерге қолжетімді шарттармен баспана иесі болуға мүмкіндік береді. Бағдарламада бастапқы жарна төмендетілген. Пәтерді бастапқы немесе қайталама нарықтан, елдің кез келген қаласынан, тіркеуге байланыссыз сатып алуға болады. Қазіргі жоба алдыңғы бағдарламаның табысты тәжірибесіне негізделген. Бұған дейін «Ұмай» бағдарламасы арқылы 3 660 әйелге баспана алуға көмектестік», – деді Отбасы банк басқарма төрайымы Ляззат Ибрагимова.

Ұмай

Бағдарлама қатысушылары үшін тұрғын үй таңдауы кең болады. Дайын бастапқы тұрғын үйді де, Қазақстандық тұрғын үй компаниясы кепілдігімен немесе сақтандыру құралдары арқылы құрылысы жүріп жатқан тұрғын үйді де сатып алуға мүмкіндік бар. Сонымен қатар 2016 жылдан ерте салынбаған қайталама нарықтағы пәтерді де алуға болады.

Бір несие арқылы тұрғын үй сатып алу мен жөндеуді қатар рәсімдеуге мүмкіндік қарастырылған. Егер қатысушы Алматы немесе Астанадан баспана алса, банк пәтер құнының 80%-ына дейін несие береді. Қалған 20%-ын бастапқы жарна ретінде сатып алушы өзі төлейді. Ал басқа өңірлерде бұл көрсеткіш 85%-ға дейін жетіп, бастапқы жарна 15%-ды құрайды.

Несиенің ең жоғары сомасы – 50 млн теңге. Отбасының таза жиынтық табысы 1,25 млн теңгеден аспауы тиіс. Қарыз мерзімі – 25 жылға дейін.

Сондай-ақ бағдарлама аясында қарыз алушы тұрып жатқан үйді жөндеуге бөлек несие алуға болады. Жөндеуге берілетін қарыздың ең жоғары сомасы – 15 млн теңге. Бастапқы жарна банк депозитіне 0-ден 50%-ға дейін. Қарыз мерзімі – 25 жылға дейін.

«Ұмай» бағдарламасы бойынша сатып алынған тұрғын үй әйелдің атына рәсімделуі тиіс. Егер ол некеде болса, мүлік ортақ меншік ретінде тіркеледі. Қоса қарыз алушыларды тартуға болады.

«Жасыл ипотека»

Қазақстанда тұрғын үйлердің 80%-дан астамы энергияны көп тұтынады. Бұл олардың иелері үшін жылу мен электр энергиясына шығынның жоғары болуына әкеледі. «Жасыл ипотеканы» іске қосу және «жасыл» тұрғын үй сатып алу коммуналдық төлемдерді азайтуға мүмкіндік береді. Сонымен қатар бұл құрылыс нарығын экологиялық стандарттарға сай жобаларды дамытуға ынталандырады.

Бағдарлама қатысушылары дайын бастапқы тұрғын үйді, Қазақстандық тұрғын үй компаниясы кепілдігімен немесе сақтандыру құралдары арқылы салынып жатқан тұрғын үйді, сондай-ақ қайталама нарықтағы пәтерді сатып ала алады.

Бұл ретте тұрғын үй «жасыл құрылыс» стандарттарына сай болуы және OMIR сертификатына (күміс, алтын немесе платина деңгейі) ие болуы тиіс. Бір несие арқылы тұрғын үй сатып алу мен жөндеуді қатар рәсімдеуге болады.

Банк «жасыл» тұрғын үй сатып алу үшін пәтер құнының 80%-ына дейін несие береді. Қалған 20%-ы бастапқы жарна ретінде төленеді.

Несиенің ең жоғары сомасы – 50 млн теңге. Отбасының таза табысы 1,25 млн теңгеден аспауы тиіс. Қарыз мерзімі – 25 жылға дейін.

Сондай-ақ тұрғын үйді жөндеуге бөлек несие алу мүмкіндігі бар. Оның ең жоғары сомасы – 15 млн теңге. Бастапқы жарна – 0-ден 50%-ға дейін. Қарыз мерзімі – 25 жылға дейін.

Бағдарламаға қатысу үшін соңғы алты айдағы ресми табысты растау қажет. Тұрғын үйді тіркеуге қарамастан елдің кез келген өңірінен сатып алуға болады. Сонымен қатар қатысушының меншігінде басқа тұрғын үйдің болуы маңызды емес.

Еске сала кетейік, бұған дейін Отбасы банк басқарма төрайымы Ляззат Ибрагимова «Ұмай» ипотекасын қайта іске қосу жоспарланып отырғанын хабарлаған еді.